Xandru Fernández

“Ye una batalla perdía porque’l mázcaru convirtióse nel signu visible del bon ciudadanu, y contra eso nun hai razonamientu que valga”

Falemos de pedagoxía y disciplina. Mientres munchos años, como profesor, tutor y xefe d’estudios apliqué esa midíaa que toos conocéis llamada “castigu colectivu”. ¿Quién foi? ¿Nun foi naide? Pos castigada tola clase.

Los que más protestaben yeren los alumnos de los que tabes casi ciertu que nun fixeren nada. Tamién los sos pas. Pero polo xeneral acatábase esa midida disciplinaria porque venía nel llote heredáu de la educación nacionalpatriótica, igual que la potestá de los profesores d’educación física pa faltar al alumnáu, por exemplu. El casu ye que dexé d’emplegar esa midida discutiblemente correchora porque, amás d’inxusta, yera ineficaz: solo consiguía que se portaren meyor los que yá se portaben bien, entantu los infractores siguíen a lo suyo, confiaos agora en que, como’l castigu sería colectivu, l’autoridá escolar tendría más escupulicios a la d’escorrer una conducta contraria a les normes de convivencia.
Obligar a llevar mázcaru en toles ocasiones ye una forma de castigu colectivu y, tarrezo, tan xusta y eficaz como’l castigu colectivu. La escusa de que se trata d’obligar a la xente a que síeya más responsable y cumpla la llei, pide’l principiu: si hai persones qu’incumplen la llei, nun cabe esperar que por poner otra llei vaigan obedecer. A cencielles desobedecerán dos lleis en cuenta de una.

Si les conductes de riesgu que quies suprimir yá son sancionables agora mesmu, sanciónales; si nun quies o nun puedes sancionales, nun pretendas que me crea que lo fadrás si pones una llei nueva, porque nun tien sentíu.
Tou esti asuntu de los mázcaros encárpame, ye ciertu, pero non pola “cosa en sí”, sinón polo qu’implica d’atentáu contra les riegles de la lóxica, los presupuestos del sentíu común y los principios básicos de la convivencia en sociedaes suxetes a Drechu.

Cola obligatoriedá de llevar mázcaru en cualquier circustancia, nun tas convidando a les autoridaes a intervenir en llugares y momentos onde rescampla que se tán saltando les midíes de seguridá más elementales (¿vistis la celebración del ascensu del Cádiz?), al contrariu, tas convidándo-yos a intervenir en llugares y momentos más accesibles a la policía (individuos aisllaos, non grupos con altos niveles de concentración etílica, por casu). Tampoco tas faciendo nada pa romper les barreres de clase qu’eses midíes refuercen y, sicasí, son oxetivamente más peligroses (un exemplu: nenguna de les restricciones que s’apliquen nes sableres ta aplicándose en piscines d’urbanizaciones privaes, onde la concentración de persones ensin distancia de seguridá ye máxima y, na mayoría de los casos, nin hai xixilancia nin control dalgunu de les midíes hixéniques).
Pero ye una batalla perdida porque’l mázcaru convirtióse nel signu visible del bon ciudadanu, y contra eso nun hai razonamientu que valga. La lóxica binaria de la confrontación social tiende siempres al par bonos/malos” porque ye’l que meyor s’afai a los modelos narrativos en que fuimos socializados (nun voi desendocar esto equi, nun ye’l sitiu y amás hai coses qu’a partir de cierta edá yá nun se faen de baldre). De cuenta que daqué tan senciellu como llevar un trapu na cara, seya una mázcaru quirúrxicu, un nicab o un pasamontañes, gana por goliada a cualesquier otra forma d’identificación, sobremanera si nella puedes subsumir cualesquier otra. Afitáivos que, al contrariu de lo qu’asocede n’Estaos Xuníos y en países más inhóspitos como’l celebru de Ouka Lele, n’España hai consensu ente esquierdes y dreches, nun hai una drecha antimascarilla nin la habrá nunca (igual que tampoco hai diferencies territoriales nesti aspeutu, yo siquier nun veo qu’ente Torra y Barbón haya demasiaes diferencies a la de remanar esto per vía testicular).

Lo único qu’espero, y dígolo con franqueza, ye qu’a partir de que n’Asturies ye obligatoriu andar pola cai cola cara tapada (¿alcordáisvos de cuando yera un atentáu contra la Llibertá y la Civilización qu’una llibrería n’Estaos Xuníos nun quixera vender llibros de JK Rowling?), empecéis a emplegar les hores del díe que vos quedarán llibres (les qu’invertíais en reclamar esa midida y en faltar a los que nun compartíen la vuesa fe) en fiscalizar a les alministraciones y los gobiernos y non a los ciudadanos: toos vamos salir ganando cola vuesa capacidá crítica, y dígolo, esto último, ensin solombra d’ironía.

This work is licensed under a Creative Commons Attribution 4.0 International License.