Mario Arbesú.

Lleo nes redes sociales dalgunos analís políticos fechos dende la óptica de la esquierda asturiana. Y falo con xente, presones tamién esmolecíes pola rialidá político, ente les que conozo de too: principalmente son votantes del PSOE, Podemos ya IU, pero tamién hai quien que s’astién o vota a Andecha Astur en dalguna ocasión. La conclusión que recueyo d’esos contautos ye, en bona midía, siempres la mesma: tán arguyosos del mapa políticu que surdió en Galicia y Euskadi nestes caberes elleiciones, ye más: nagüen por tener n’Asturies un mapa asemeyáu

Coinciden en que-yos prestaría que n’Asturies tuviere representación parllamentario un partíu comu Andecha Astur. Tamién reconocen que-yos prestaría que fore una fuercia más o menos importante, que pudiere gobernar o, sinón, que fore la oposición a un supuestu gobiernu d’Asturies ocupáu por un partíu mínimamente “centráu”, comu’l PNV, el PP de Feijóo o un PSOE asturianiegu (lloñe de cualisquier de les versiones conocíes: Tini Areces, Javier Fernández, Adrián Barbón).

El casu ye que semos munchos los que mos entrugamos por qué n’Asturies nun ye dable un mapa políticu comu’l d’Euskadi o Galicia.

Rempuestes a esi dilema seguramente habrá milenta, y mui estremaes. Yo toi convencíu de que n’Asturies hai una base social suficiente pa llevar a una fuercia comu Andecha Astur a la Xunta Xeneral; por eso llevo militando n’Andecha Astur, con mayor o menor intensidá, dende 1998.

Tengo ñidio que nun soi nengún visionariu. Ya cumplí 41 años, llevo tola vida presentándome a les elleiciones comu candidatu d’Andecha Astur y enxamás nun consiguimos representación parllamentario. Por embargu, teo la convición de que ye dalgo perfechamente posible. Asina que trabayo p’algamar esa rialidá cuandu pocos lo faen, porque toi seguru de qu’esti país nun ye tierra ermo pal soberanismu, pero hai de llabrar y semar enantes de recoyer. Lo que ye posible en Galicia o Euskadi tamién pue ser rialidá n’Asturies, sólo tenemos de querelo, creyelo y facelo. Y paezme qu’ehí ta la rempuesta a la entruga sobro la posibilidá de qu’Andecha Astur algame representación na Xunta Xeneral.

Dempués de camentar abondo nello, creyo que la principal torga pa qu’eso seya rialidá ye la falta nel Pueblu Asturianu d’un sentimientu d’autoestima suficiente. Por dicilo d’otru mou, fáltamos empoderamientu comu Pueblu.

Poro, cuandudaquién diz “a mi prestaríame qu’hubiere un PNV n’Asturies, pero voto al PSOE”, o “a mi prestaríame qu’hubiere un BNG o un EH Bildu, pero voto a Podemos”, nesos casos podremos atopar mil propuestes de desplicación, pero la mayoría suena a simple esculpia. “Prestaríame un réxime non racista, pero voi votar al Ku Kus Klan”. Lo mesmo. Nun faen falta más desplicaciones, creyo.

Cuánto queremos una cosa y cuánto tamos dimpuestos a sacrificar pa consiguilo suena a discursu motivacional nel deporte o nuna empresa. Pero ¿nun creyéis qu’ehí ta la clave de lo que mos pasa n’Asturies? Trunfa’l mieu porque,comu Pueblu, igual nun tamos dimpuestos a arriesgar muncho o a sacrificar ná de lo que tenemos. Y por nun arriesgamos a perder tamos dexando de ganar.

Veámos lo que pasa nel tarrén de la oficilidá, comu comparanza. Demientres llargu tiempu semáronse per Asturies milenta entrugues velenoses sol fechu de que l’asturianu seya una llingua ensin oficialidá, mentantu que l’euskera y el gallegu son oficiales. Entrugues del tipu: ¿sedrá que ye un dialeutu del castellán?, ¿sedrá qu’hai mil bables?, ¿sedremos menos que vascos y gallegos?… Pero, nesti casu, el Pueblu asturianu, mayoritariamente emperruñóse en defender la so llingua col mayor puxu. Y güei toles ciudadanes y ciudadanos sabemos desfacemos del velenu que teníen aquelles entrugues. Porque, magar el tamañu y la fuercia l’enemigu, enxamás perdimos l’empeñu en ganar esa batalla. Poro, l’asturianu ta más cerque de ser llingua oficial, porque siempres creyimos con fuercia que yera posible, dalgo que nun mos pasa igual nel ámbetu’l soberanismu.

Yá sabemos qu’el mieu pue ser paralizante y fuercia a dexar de faer munches coses que mos prestaríen. Comu sociedá ocúrremos lo mesmo.  Poro, si dalgo necesitamos ye superar aína los mieos pa lluchar polo que queremos y pa defender los nuesos intereses en tolos ámbetos comu mocedá, muyeres, estudiantes, paraes, pensionistes, trabayaores, emigrantes, comu colleutivu LGTBI… pero tamién comu asturianos y asturianes, comu Pueblu.

Que les coses tean difíciles, qu’esista represión, que nun tengamos los recursos suficientes, que pertenezamos a una minoría… torga’l nuesu desendolcu presonal y colleutivu, pero eses torgues (comu nel casu la oficialidá) tien de ganales siempres el pruyimientu de querer y creyer, pa convencer y lliderar.

Asturies necesita organizaciones comu Andecha Astur. Pero Andecha Astur necesita convencer a la xente de que nesti país ye posible algamar poder políticu. Y pa ello, si nun tenemos recursos tendremos de facer por consiguilos o suplir la so carencia con más esfuerciu. Si nun somos bastantes nel compromisu organizativu tendremos que pidir a más xente que s’integre. Si hai poques manes militantes tendremos que facer por multiplicales. La solución enxamás nun ye martirizamos por ser pocos, por ser poco arteros o polo mal que salen lescoses; tampocu lo ye culpabilizar a otros de los nuesos fracasos.

Nun somos malos. Conozo a la xente del BNG y d’EH Bildu y nun son meyores, nin tienen mayor claridá d’idegues, nin son más intelixentes, nin más altos nin más guapos. Son xente mui capacitao, pero nun ye ná que nun tengamos equí, n’Andecha Astur o n’otros espacios de la esquierda soberanista.

Culpabilizar a los demás de los nuestros fracasos tampoco sirve de nada. Siguiendo col paradigma de la oficialidá, angüañu a naide se-y ocurriría dicir que la culpa ye de los que reclamen la oficialidá pero nun lo consiguen porque lo faen mal o son unos incapaces.Esi argumentu ye del que mos quier en silenciu.

L’asturianu nun ye oficial. Pero la culpa nun ye del qu’esborrió cartelos, del que foi a manifestamientos, del qu’escribió, faló o canció n’asturianu, del que fizo teatru, poesía o música, del que lo estudió y punxo unos finxos académicos, del que fizo por caltenelu, del que fizo por deprendelu o del que fizo por usalu. Nun ye culpa de la presona que s’organizó pa vindicalo y lleva faciéndolo tola vida. Nin del que fizo murales o pintaes pola oficialidá. Nin de los que ficieron encierros o semaron too de pegadielles. Si l’asturianu güei nun ye oficial nun ye por culpa d’ellos y elles. A la escontra, si tamos más cerque de que seya oficial ye gracies a ellos y elles. Y hebio qu’arriesgar, y hebio represión, y hebio criminalización, marxinación, ridiculización, censura y mieu. Mieu a facelo, mieu a falalo, a escribilo y a vindicalo, pero tamos a piques de consiguilo porque creyimos, porque quinximos y porque convencimos.

Nel planu cultural esos avances tán ehí. Pero nel planu políticu necesitamos más.

Necesitamos sumar, incorporar presones, que torne xente que ta’n casa. Cualisquier presona pue participar n’Andecha Astur escoyendo’l so nivel de participación, nun importa aú tuvimos o d’aú vengamos. La idega ye xunir fuercies y esfuercios pa caminar pel mesmu camín con tolos seutores soberanistes y d’esquierda que yá esisten, pa xenerar el movimientu necesariu que por fin consiga qu’Asturies tenga’l pesu políticu que toes y toos sabemos que tien de tener por hestoria y por identidá, pero sobre too porque nosotres y nosotros queremos que lu tenga. Porque ye y porque queremos que seya.

Mario Arbesú

This work is licensed under a Creative Commons Attribution 4.0 International License.