El presupuestu destináu a nómines parllamentaries -1’69 millones nel 2004 y 2’63 nel 2020- y a los partíos -1’34 nel 2004 y 3 nel 2020- cuasi duplicó nos caberos 16 años
Esti añu ta prevista la devolución de los sos drechos, retayaos n’anterior crisis y nun tornaos, a los funcionarios dependientes de l’alministración pública asturiana, incluyendo sanitarios, docentes, encargaos de llimpieza, trabayaores na xusticia, asesores parlamentarios y demás.
Ello implica un espoxigue de 103 millones nel presupuestu, daqué que’l Gobiernu del “Principado” considera difícilmente caltenible, polo que llevamos unos meses sintiendo falar a Adrián Barbón ya’l so executivu de la necesidá de “controlar los gastos del funcionariáu”. Sicasí, nos caberos años el coste de les plantiyes medró un 67% mentantu los costes políticos –incluyendo diputaos y asignaciones a los grupos de la xunta- medraron un 84 %, ello ye, un 17% más que’l coste de los emplegaos, ensin que se plantegue amenorgar estos caberos.
De fechu, l’aniciativa de retayar los sueldos a los diputaos y les asignaciones a los grupos parlamentarios plantegada por mor del andanciu nun prosperó, siendo sofitada namás polos dos grupos parlamentarios teóricamente más opuestos, Podemos y Vox, que coincidieron nesta cuestión.
Nuria Prendes
This work is licensed under a Creative Commons Attribution 4.0 International License.
