Los trabayaores respuenden darréu a la noticia de la perda de la so paga estra de branu y güei mesmo entamen les protestes

La direición de la empresa ausiliar más importante d’Arcelor Mittal, Daorje, qu’opera en Veriña y Avilés, anunció ayeri llunes a los sos emplegaos que nun cuenta pagayos la paga estra de branu, prevista pa la prósima nómina.  L’anuncia comunicóse telefónicamente al Comité d’Empresa ayeri llunes, lo que prevocó la reación inmediata de los afeutaos. De magar ayeri mesmo quedó paralizada cualisquier intervención de retén y dende güei nel primer turnu de la mañá los trabayaores remanecen nel vestuariu de la empresa, ensin cambiase nin trabayar.

A les 10:00 tendrá llugar una concentración delantre les oficines cientrales de Daorje nel PEPA d’Aviles a la que tan convocaos tolos trabayaores en situación d’IT, en vacaciones, descansu, ERTE y xubilaos parciales.

El Comité d’Empresa anunció que les movilizaciones continuarán fasta que la empresa faiga efeutiva la paga estra, considerándo que fasta entós s’alcuentren en situación de “conflictu permanente”, entamándose les aiciones xudiciales oportunes pa desixir a la empresa responsabilidaes polo que califiquen de “nefasta xestión”.

 Nuria Prendes

This work is licensed under a Creative Commons Attribution 4.0 International License.