Asturies entama’l cursu 20/21 con 82 puestos de Pedagoxía Terapéutica y 69 especialistes n’Audición y Llinguaxe menos

Anantes de la cellebración de la segunda mesa Sectorial encargada de negociar el protocolu d’organización de la actividá docente pal prósimu cursu 20/21 los sindicatos de docentes aporfiaren en que l’aniciu de cursu tenía de dir acompangáu d’una deteición anicial de les necesidaes educatives de ca escolín tres de la suspensión de l’actividá lleutiva presencial de magar el Marzu pasáu, teniéndose en cuenta la importancia de la recuperación física y emocional de la reciella ya incidiendo mui especialmente nel coleutivu d’escolinos con Necesidaes Educatives Especiales, pa lo que yera imprescindible reforciar los equipos d’orientación y d’atención especializada.

Nel mesmu sen s’espresaben les families, que lleven tiempu aportunando na urxencia de dar a los rapacinos con NEE l’atención específica que precisen y que nun tuvieron demientres l’empreslle.

Sicasí, l’aniciu del procesu  de convocatoria pa l’alxudicación de vacantes pente’l profesoráu interín, amosó que les places ufries, lloñe d’ampliase comu se vien pidiendo, amenorgáronse en delles especialidaes, comu ye’l casu de los  Conservatorios de Música, qu’ apaecen ensin places d’interinidá y, de forma significativa, en casos comu Audición y Llinguaxe (AL) y Pedagoxía Terapéutica (PT), que son la base del trabayu d’atención a la diversidá y que pierden respeutivamente 69 y 82 puestos.

Redaición InfoAsturies

This work is licensed under a Creative Commons Attribution 4.0 International License.