Llamen a tar sollertes ante prósimes convocatories d’actos de refuga a la monarquía española, que dirán anunciando nes redes en función de les visites que la familia Real faiga per Asturies

Ante la visita prevista por parte de los reis d’España a Asturies pa la prósima semana, ayeri de magar les cincu la tardi delles organizaciones y persones a títulu individual aconceyaron na Casa Sindical col envís d’organizar la rempuesta asturiana a lo que consideren una prevocación ya una “innecesaria humildación”. D’ellí salieron col determín de facer un llamamientu públicu al Pueblu Asturianu a tar sollertes ante les prósimes convocatories d’actos de refuga a la monarquía española.

L’estremu secretismu col que la Casa Real ta tratando la que sedrá la cabera parada del so “Tour de Blanqueamientu” fae imposible pol intre concretar llugar y momentu de los actos de refuga a la mesma, polo que les organizaciones aconceyaes acordaron llanzar al traviés de les redes un avisu a toles persones ya organizaciones antimonárquiques pa que ten sollertes a les convocatories que, en función de la información sobre la visita de los reis, dirán faciéndose nos prósimos díes baxo’l llema “Asturies nun tien Rei”.

Amás de les aiciones que desendolquen a cortiu plazu, los presentes nel conceyu alcordaron continual nel futuru cola campaña en contra  la monarquía española, istitución a la que consideren “obsoleta, anacrónica y antidemocrática”.

Nuria Prendes

This work is licensed under a Creative Commons Attribution 4.0 International License.