Dientru’l marcu d’aiciones contra la corona española y a favor de la República Asturiana, Andecha Astur lleva’l mensaxe republicanu a la Ponte Romana de Cangues
Na tardi d’ayeri miembros d’Andecha Astur desplegaron enriba la Ponte Romana de Cangues un mensaxe en lletres xigantes nel que podía lleese “República Asturiana”. L’actuación, que foi acompangada con música de gaita y numberoses asturines, duró cerca de media hora y despertó la curiosidá de los munchos turistes que n’aquel intre esfrutaben del alrodiu y que rexistraron l’actu colos sos móviles.
La prósima visita de los reis d’España a Asturies programada pa esti xueves y l’acumulación de noticies alrodiu la, per otru llau perconocía, corrución endémica de los Borbones, pon en marcha una campaña de refuga a la monarquía que s’allargará depués de finar esta selmana de visites.
Dientro de la urxencia, compartía con tolos pueblos del estáu, de romper definitivamente cola monarquía española ya’l réxime del 78, heriedu direutu del franquismu, Andecha Astur quier rescamplar que nun ye abondo con retirar los privilexos a la familia real, sinon que ye imprescindible que la nuea república que d’ehí nazca nun seya un copia-pega continuista del sistema español que carecemos anguañu, llendándose a retirar la figura’l rei.
La organización nacionaliega revindica que’l camín pa finar col Reinu d’España pasa por declarar la República Asturiana “que permita al Pueblu Asturianu ser soberanu y crear pa si un futuru propiu nel que vivir con dinidá. Dende los pueblos del Estáu tendrán que ñacer les repúbliques que presllen la transición, finando col Reinu d’España y presllando un ciclu hestóricu”
La Ponte de Cangues, reconocíu pol so simbolismu venceyáu a la monarquía asturiana, ya fore escenariu n’otres ocasiones d’actos a la contra la monarquía española, comu va dos años cuando se desplegó dende elli una pancarta col llema “Asturies nun tien Rei”. Precisamente esi ye’l llema que se caltién esti añu na convocatoria de protestes contra la presencia de los reis d’España n’Asturies y contra la so esistencia mesma.
Andecha Astur xúnese a otru garrapiellu d’organizaciones nel llamáu a aconceyar baxu’l llema “ASTURIES NUN TIEN REI”, en rempuesta al paséu los Borbones pel nuesu país. Pa ello tenéis que tar sollertes a la convocatoria urxente que s’espublizará nes redes sociales.
Nuria Prendes
This work is licensed under a Creative Commons Attribution 4.0 International License.
