La Selmana del Jazz de Candás sobreponse al andanciu y cellébrase esti añu, seique con restriciones, siendo un de los pocos eventos musicales que caltién una programación de conciertos pa esti agostu
La Selmana del Jazz, festival de música improvisao que lleva cellebrándose de magar el 2013, nun faltará esti añu a la so cita, seique les estraordinaries condiciones nes que nos alcontramos y les dificultaes lloxístiques obliguen a eliminar talleres, cursos d’improvisación, conferencies y actuaciones n’establecimientos. Caltién, eso sí, los conciertos, qu’esti añu sedrán cuatro y tendrán llugar nel escenariu principal, qu’esti añu s’alcontrará na Fábrica d’Ortiz.
Les actuaciones, con entrada de baldre, aniciaránse’l miércoles 5 d’Agostu, día nel que’l cartel cuntará con duple conciertu de magar les 20:30, y continuarán dica’l sábadu ocho.
Abrirá l’eventu “Solar”, grupu “made in Candás”, compuestu por permozos participantes n’años anteriores del Cursu d’Improvisación de la Selmana del Jazz de Candás que, con residencies tan llonxanes comu Londres, Zaragoza, Uviéu y Fuexu, son quien a continuar cola so collaboración a distancia. Darréu, entrará n’escena “Forza”, el primer proyeutu en solitario del músicu asturiano Jorge Cambareli. Un trabayu que contien composiciones propies, con influencies que van dende llatin-jazz a la world music, pasando pol funk.
El xueves 6 tendrá llugar un de los conciertos más esperaos, nel que participa Lafu Radón, ún de los creadores de la Selmana del Jazz y profesor de guitarra y armonía moderna de la Escuela Municipal de Música de Candás, quien xunto a Xaime, Oscar y Wilón forma parte de “Maravillas del Cosmos”, un grupo de jazz fusión integrado por veteranos profesionales de la escena musical asturiana. “La so música ye fresco, azogoso, enlleno d’enerxía y con un nivel téunicu ablucante. Les sos composiciones, que xunen la complexa armonía del jazz cola potente fuercia espresiva del rock, nun dexen indiferente a naide, y presten tanto al oyente casual comu a los paladares más esquisitos”. Siéntelos.
El tercer conciertu, el vienres 7, dirá de la man del guitarrista y compositor Gio Yáñez , en cuartetu xunto a adlgunos de los sos músicos favoritos pa dar forma a un repertoriu que bancia pente’l hardbop, el jazz modal y les nueves tendencies. Siéntelu.
Pondrá’l puntu final al festival el francés Rémi Dugué, que traerá a Candas los sos repertorios manouche, funk, swing, bop o hard-bop , tou adobao cola so propia salsa.”Rémi Dugué convida a entamar un viaxe enllenu fantasía, sorpreses y humor ufriendo una poesía que lo mesmo puede ser sensible y sensual, que rezumir esa enerxía xabaz ya endexe propia del jazz, de tolos tipos de jazz, de la música, l’arte… la vida misma”. Siéntelu.
Llucía F. Marqués
This work is licensed under a Creative Commons Attribution 4.0 International License.
