Güei tendrán llugar perdayuri actos de comemoración de la traxedia y menutos de silenciu pa facer llegar la voz de les muyeres  Êzîdî a les muyeres de tol mundiu

Va 6 años dende l’ataque de bandes ISIS al pueblu Êzidi en Shengal, el 3 d’Agostu de 2014. 250.000 Êzidîs foron forciaos a abandonar Shingal, el númberu de güerfanos oficialmente recoyios esos díes ye 2.745, el númberu de muyeres y neños desapaecíos sigue medrando. Nun ye daqué del pasáu, ye actual. La estratexa de desaniciu pasa pol asesinatu de los homes, la esclavización sesual de les muyeres ya’l secuestru de rapacinos. “La violación sistemática de muyeres y reciella  Êzîdî, la so venta en mercaos d’esclavos, el so sometimientu a toa triba de tortura y violencia ye’l militarismu -un sistema d’hexemonía masculín- buscando perpetuar la mentalidá masculina dominante al traviés de los cuerpos de neños y muyeres”

L’oxetivu nun ye otru que finar col presente y futuru de tou un pueblu, l’Èzidi, marcáu por unes creencies qu’ofienden especialmente al isllamismu. Adoradores de Malak Tawus, l’arcánxel cayíu que pa los cristianos y los musulmanes ye Satanás, lleven sieglos careciendo l’acosu d’otres relixones, nos caberos tiempos, del fanatismu asesín de Daesh. La ofiensa pa los islamistes ye mayor por mor de la determinación, fuercia y puxu de les muyeres d’esti pueblu, que lloñe d’amedranar xunen al exércitu pa enfrentar cara a cara a los sos violadores, munches d’elles depués de pasar años de cautiveriu comu esclaves. “Los homes de Daesh tienen miéu de las muyeres soldáu porque creen que, si elles los maten, nun dirán al cielu”.

Cada añu per estes feches les combatientes de la Xunión de Muyeres de Shengal (YJŞ)  ya’l Movimientu de Muyeres Llibres del Kurdistán (TJA) reclamen que nun s’escaezan estos crímenes, vengar a toles víctimes y finar cola aniquilación del so pueblu y la so cultura.

73 organizaciones de muyeres d’estremaos continentes declaren el 3 d’Agostu comu’l “Díi internacional de llucha contra’l femicidiu ya’l xenocidiu” y soliciten el reconocimientu d’esti día por tolos estaos, asina comu la toma de midies conxuntes pa asegurase de qu’otra masacre comu esa nun se repita. La más implicada nesta reclamación ye la TJA, que insiste na importancia de llevar a los criminales ante una corte independiente internacional y finar col xenocidiu cultural en nome de la integración. Desixen a Europa qu’abandone la so política de destrución de ñicios relativos al xenocidiu de Shingal y de les muyeres Êzîdî.

This work is licensed under a Creative Commons Attribution 4.0 International License.