P’Andecha Astur la fuxía del Rei Eméritu d’España, llevándo con elli toles perres, tolos títulos y tola impunidá polos presuntos delitos que cometiere, ye un bon puntu d’inflesión nel que centrase nel alderique sobro la rellación d’Asturies col Estáu español,

La organización nacionaliega señala que’l marcu xurídicu-políticu que rixe la rellación pente Asturies y España ñaz del mesmu venceyu que define la monarquía y l’Estáu español  y que definió l’anterior dictadura franquista, polo que, una bones amosáu el nivel de corrución y podrigañu de les mesmes, esti ye un bon intre pa francer con esa servidume impuesta al traviés del Estatutu d’Autonomía -non votáu polos asturianos- y plantegase una vía de futuru estremada pal pueblu asturianu.

“Nos caberos 40 años pudimos comprebar cómu la imposición d’un estáu español y monárquicu ye dalgo que-y sienta mal a Asturies, tanto nel aspeutu políticu, comu socioeconómicu, llaboral, medioambiental, cultural… Poro, convitamos a abrir esi alderique que guete nuees fórmules pa garantizar un futuru de xusticia, prosperidá y llibertá pal pueblu asturianu”.

En tou casu, recalquen “ná permite señalar a Juan Carlos comu responsable únicu de la situación insostenible na que s’atopa la Casa Rial española, entera. Porque, anque sólo seya por conocer la situación, toos ellos son polo menos cómplices. Los munchos años de reináu con que los Borbones castigaron al Estáu español siempres se carauterizaron por escándalos rellacionaos con ganancies ilícites, actividaes inmorales y, sobro too, por un paripé fáutico-istitucional que mazcaraba la monarquía de réxime democráticu”.

Nuria Prendes

This work is licensed under a Creative Commons Attribution 4.0 International License.