Mariano Suárez, mayestru, miembru de la executiva d’Andecha Astur, autor del llibru “Quién escaeció a Belarmino Tomás” y conocíu poles sos charres nes que revisa la hestoria dende la óptica de les sos consecuencies p’Asturies, valora los caberos acontecimientos venceyaos a la corona española

• ¿Qué valoración ties de la fuxía de Juan Carlos de Borbón?
• Ye eso: una fuxía. Un esperpentu políticu, el mayor espeutáculu públicu nos tiempos del coronavirus. Ye una representación vergoñosa qu’humilda al protagonista y tola rial compañía de comedies de La Zarzuela.

Juan Carlos fuxó por un amiestu circustancies.

• Los posibles delitos que-y señalen fáenlu candidatu a presidiu, presuntu delincuente condergable xudicial, política y éticamente.
• La xusticia suiza investiga estos posibles delitos, nun procedimientu qu’avanza y ca vegá ye más públicu.
• La prensa internacional difunde los fechos, faciendo ineficaces les sovenciones coles que s’acallenta a los medios españoles.
• Dende les cloaques l’Estáu espárdese información dañino pa los Borbones comu fórmula d’avance en griesques internes.
• La xente ca vegá ta más desencantexao cola monarquía y la so casta político: los progresistes de la cabera fola (Podemos) cortocircuitaron l’asaltu a los cielos y, dende esa frustración, la xente aguanta pior les prevocaciones, énte elles una corona que delinque p’arriquecese.
• Tamos na pior época pa que se noten les brutales diferiencies de poder socioeconómicu: reis comisionistes que reciben cifres multimillonaries y princeses d’alquiler con regalos de propiedaes pervalioses, mentantu’l pueblu trabayaor pasa per una de les mayores crisis sociollaborales y económiques con que lu castigó’l sistema capitalista.
• Los corsés político-identitarios colos que Franco cinchó naciones diverses nun Estáu únicu, pa trespasalu a Borbones y casta política española, tán vieyos y aforoñaos.

• ¿La corrución ye un problema endémicu de la familia Borbón o’l fallu ta na monarquía mesma?

Los Borbones que reinaron nel Estáu español siempres foron unos gobernantes corrutos no monetario y no ético.

Isabel II (retataragüela de Felipe) foi una gran traficante d’esclavos y acumuló grandes riqueces. Alfonso XIII (bisgüelu de Felipe), que foi acusáu de llucru illícitu, estafa y malversación, tamién mansuñó riqueza enforma. Juan de Borbón nun reinó, pero acumuló padremuñu por valor de más de 1000 millones de pesetes, qu’heredó Juan Carlos na so mayor parte.

Les monarquíes sofítense nun principiu corrutu: créyense dinastíes superiores destinaes a someter y gobernar a los súditos. Toles monarquíes son corrutes porque, ñaciendo d’una conceición viciá del poder, nun tienen frenu éticu pa caltenese nél y arriquecer.

Pero otros rexímenes políticos también tienen un riesgu altu d’apodrecer pola corrución, porque ye difícil qu’un réxime se contenga por sí solu.

Un sistema políticu sólo pue garantizar la so virtú ética cuandu’l pueblu controla al poder (y non al revés), cuandu hai democracia con participación direuta, cuandu lo más importante son los conceyos abiertos de la ciudadanía, cuandu los representantes políticos puen ser removíos en cualisquier momentu de los sos cargos, cuandu la xente decide de contino y non ca cuatru años…

• ¿Cómu valores la “xira” que ficeron apocayá Felipe y Leticia pel Estáu español?

Foi un exerciciu de blanquiamientu y fortalecimientu de la corona española.

Nun tenía xacíu: ¿recorrer l’Estáu pa ver cómu se supera la cris del COVID19? ¿Y pa eso visiten el negociu de Fernando Alonso, un monumentu en Xixón que foi una cacicá d’Areces y el vertederu COGERSA? Nun vieron hospitales, oficines del Sirviciu Públicu d’Emplegu, repartos de xinta a necesitaos…Eso non.

La corona y el gobiernu PSOE-Podemos, cuandu algamaron con Juan Carlos “el pautu la fuxía”, marcaron calendariu. Primero, Felipe y Letizia pasien la so realeza,intentando recoyer malamente dellos aplausos y semeyes guapes. Segundo, Juan Carlos despídese de nuechi de la so corte y fuxeal riscar. Tercero, preséntase públicamente la carta’l campechanu padisimular la esistencia d’un pautu de los poderes fáuticos. Cuarto, el mediu gobiernu’l PSOE sal a pechu descubiertu a defender la monarquía, el mediu gobiernu de Podemos fáese’l tontu engañáu y fala de república española percoyéndose a los sillones de ministros del rei, y los medios de comunicación cumplen la so fonción de primer fuercia de choque del Estáu capitalista español.

• En tolos territorios que visitaron nesa “xira” hebio dalguna rempuesta popular. ¿Qué mos dices d’Asturies?

Comu nun podía ser menos, hebio rempuesta. Si los Borbones vienen, Asturies respuende.

N’Asturies, magar la urxencia cola que s’entamen estes rempuestes, diose l’apautamientu de varies organizaciones: Centros Sociales, CSI, Darréu, FAMYR, Comité pola Amnistía, Bloque Críticu, Anticapitalistes Asturies, Andecha Astur…

El díi que los Borbones se retrataben en L’Atalaya xixonesa,hebio una concentración nos Xardinos del Náuticu. Aconceyóse xente abondo col llema “Asturies nun tien rei” y fízose una quema popular de retratos de los Borbones.Al díi siguiente un grupu desinfeición, con traxes de proteición, visitó L’Atalaya pa llimpiar el suelu que pisaren Felipe y Leticia.

Amás, díes enantes, Andecha Astur ocupó la ponte de Cangues d’Onís con lletres xigantes que decíen claro “República Asturiana”.

N’Asturies tamos fartucos de reis, de princeses, de casta político, de costituciones foriates, d’estatutos impuestos sólo pa esplotar dende fora los nuesos recursos y pa esplotamos comu trabayaores del so sistema. Asturies merez un futuru y tomar el determín de nun renunciar a él ta nes manes de los propios asturianos. Si’l pueblu asturianu lu exerz, ési ye un gran poder, un poder decisivu, democráticu, colleutivu ya ilusionante.

• Paséu rial, refugu popular, fuxía del eméritu, acelerón de partíos españoles y prensa pa defender al rei, actuación de Podemos con pose d’engañaos… ¿Qué va pasar nel Estáu español cola corona?

Lo qu’importa ye qué va pasar con Asturies si se caltién el vixente marcu rellaciones col Estáu español.

Andecha Astur forma parte, a nivel estatal y européu, d’una coallición de fuercies soberanistes nomá “Agora Repúbliques”, que señala perbién el nuesu apueste pal futuru.

Franco dexó la so España una, grande y llibre comu heriedu a Juan Carlos I El Fuxíu. Nun procesu mal nomáu de transición, los partíos españoles,pa defender los intereses del Estáu y la so oligarquía, llantaron un sistema d’esplotación de territorios y de clas sofitáu nes “autonomíes”.

Y a Asturies castigáronla entá más: reconvirtiéronmos nel “Principáu” medieval, que mos impunxo Castiella,y otorgáronmos un “Estatutu d’Autonomía”, que tamién se mos prohibió votar.

Nos caberos 40 años, Asturies, con esi marcu xurídico-políticu ta comu ta. A Asturies col Estáu español yá ye difícil que-y puea dir pior. Poro, ye necesario entamar un nueu tiempu, una dómina na qu’axuntemos fuercies comunes alrodiu d’unos puntos mínimos que permitan asegurar el futuru les asturianes y asturianos, en condiciones de dinidá, comu pueblu y comu trabayaores.

Tamos nun momentu hestóricu, p’Asturies y pa los otros pueblos del Estáu. Y nun podemos permitimos esperdiciar esta ocasión. Falemos de l’Asturies pola que naguamos y del marcu rellación colos demás pueblos trabayaores del Estáu. En munches partes yá lo tán faciendo Y Asturies tien de coyer esi tren porque ye’l que viaxa haza’l futuru.

• ¿En resume…?

En resume: La corona fuxe. L’Estáu español posfranquista aforoña. Y Asturies tien un tren haza’l futuru que nun pue perder.

This work is licensed under a Creative Commons Attribution 4.0 International License.