A pocu más d’una selmana de la decisión municipal de baltar los tamariscos d’El Muro, l’alcaldia anuncia’l desaniciu de les xaumeres de Begoña, por pegañoses

Si el problema de los tamariscos yera estorbar nel so pasu a los ciclistes del carril bici, colo que mos atopamos na dificilmente desplicable coxuntura de baltar árboles col envís d’aplicar midies que quieren meyorar la calidá l’aire, la culpa de les xaumeres ye pingar melaza. Esta melaza nun ye propio de los árboles en sí, sinon que ye la consecuencia d’un pulgón que mora nestos árboles y qu’espoxiga cola falta lluvia, polo que’l desaniciu del pulgón abulta más cenciello o polo menos más de xacíu que baltar los árboles. De fechu, n’otros países europeos nos que s’alcontraron con esti problema la opción escoyía foi la de regar d’avezu con agua y xabón, pa frenar la proliferación de pulgones y llimpiar posibles residuos.

La consideranza de los árboles comu mobiliariu urbanu a cencielles, ensin valorar el so valir patrimonial ya ecolóxicu, lleva al gobiernu del PSOE a  tomar decisiones sobre ellos nos que nun se yos tien en cuenta comu seres vivos, sinon comu ornios prescindibles, dispreciando la so aición purificaora l’aire y comu barreres naturales contra la contaminación acústica. Amás, estos árboles son abellugu d’abondes especies d’aves qu’al tiempu  controlen l’espoxigue de plagues d’inseutos -incluyendo la viéspora velutina-, colo que’l so desaniciu descompensaría tol ecosistema.

La midía ta anguañu n’estudiu, pero por agora el criteriu decisivu pa saber si se lleva a cabu o non esta midía ye’l so coste d’execución. Los vecinos punxeron en marcha una recoyida de robles en Change.org onde se solicita a l’Alcaldesa que reconsidere la so decisión y dexe d’esquilmar el padremoñu ñatural de Xixón.

Llucía F. Marqués

This work is licensed under a Creative Commons Attribution 4.0 International License.