Seique Aralia alcordare, tres de les movilizaciones llaborales de les sos trabayaores, facer efeutives les nómines pente’l 1 ya’l 5 de cada mes, a 9 d’Agostu continúen ensin facese efeutivos los pagos correspondientes al mes de Xunetu. Considerando el pagu escalonáu, esto implica que nel meyor de los casos, ello ye, que’l pagu se produzca güei mesmo, habrá emplegaes que nun lu tendrán a la so dimposición dica’l día 12.

Amás de la nómina, débeseyos la paga de calidá de Xunetu y son delles les trabayaores qu’entá nun percibieren les anteriores. Amás, comu vienen denunciando, siguen ensin pagase los pluses de domingos y festivos llegalmente reconocios.

Per otru lláu, les ausiliares de serviciu a domiciliu reclamen que la empresa yos apurra midíes de seguridá. Denuncien que la empresa namás yos facilita guantes de pésima calidá, que rompen al mínimu roce y son insuficientes dafechu pa realizar con ellos les llabores d’aseu. Les mazcarines que reciben nun son abondes pa facer el so trabayu diariu y la so calidá dexa tamién muncho que deseyar.

Pa estes trabayaores el Conceyu Xixón ye responsable d’esta situación, ya que comu declaren “el tratu d’Aralia pa coles sos trabayaores ye deleznable. Pero ye muncho pior l’actitú del Ayuntamientu Xixón que, sabiendo tou esto, calla y otorga, mirando pa otru lláu y permitiendo que la empresa faiga con nosotres lo que quiera, precarizando más entá la nuesa situación”. Fartuques d’un gobiernu que les declara esenciales, pero nun les valora, desixen respetu y que se cumplan los sos drechos “igual que nosotres cumplimos coles nueses obligaciones curiando, tanto agora comu demientres l’andanciu, de los más febles de la sociedá”.