El conceyu más mozu d’Asturies, Noreña, con un indiz de 141, ello ye, con 1’41 mayores de 65 años por ca menor de 15, supera la tasa d’avieyamientu estatal, que recueye una media de 1’2 mayores por rapacín. Nel estremu contrariu alcontramos a Pesoz, con 9’5 persones que superen los 65 por cada menor de 15. En mediu, los 76 conceyos restantes, dando una media de más de dos vieyos por menor en toa Asturies, un cuasi el duple de la tasa d’avieyamientu española.

Les nomaes “esnales” d’Asturies son de lloñe les más afeutaes pol problema. La falta d’oportunidaes llaborales, les males comunicaciones -físiques ya dixitales- y la baxa calidá de los servicios -en munchos casos ensin acesu a educación y sanidá- lleven décades allonxando a la mocedá d’estos conceyos. Los 6 nos que la tasa d’avieyamientu ye mayor son Pesoz, Casu, Illano, Proaza, Ponga ya Ibias, toos ellos con alrodiu de 9 vieyos por menor. Nestes fasteres la situación agrávase pola desigualdá por xéneru, que s’enclina claramente a una muncha mayor proporción d’homes n’edá reproductiva frente a muyeres na mesma franxa d’edá, lo que merma abondo la tasa de natalidá.

Los alcaldes de toos estos conceyos coinciden: el turismu agabita, pero nun ye la solución. Hai que reencadarmar la ganadería, minimizar la burocracia, asegurar l’acesu a servicios -especialmente educación y sanidá- y meyorar  les comunicaciones físiques y dixitales, pero alcuéntrense a la contra una política diseñada pa y por los cientros urbanos, que desdexa el 80% d’Asturies n’ares de la cacarexada “Aria Metropolitana”.

Sicasí, incluso nes fasteres urbanes el problema ye emportante. Nin siquier la capital ye quien a retener a la mocedá: Uviéu, un de los conceyos más mozos d’Asturies, avérase a duplicar los mayores de 65 frente a los menores de 15.

Llucía F. Marqués

This work is licensed under a Creative Commons Attribution 4.0 International License.