Cola muerte esti fin de selmana d’un trabayador nel cientru lloxísticu d’Alimerka sumen ocho los acidentes mortales de calter llaboral no que llevamos d’añu
Asturies inaguraba la llista prieta de muertos n’acidente llaboral nel mesmu mes de Xineru, col fallecimientu d’un lletricista que trabayaba n’El Molinón. Esti fin de selmana morría un chaval de 27 años, al cae-y un palé de 1T nel centru loxísticu d’Alimerka, nel mesmu llugar nel que 8 meses anantes se concentraben cientos de trabayadores reclamando condiciones de trabayu dignes.
En mediu, tuvimos de despidir a un trasportista en Corias, un obreru de la costrución en Les Arriondes, un trabayaor d’ArcelorMittal en Veriña, un madereru en Corvera, un operariu n’Uviéu y un trabayaor d’El Musel en Xixón. Un total d’ocho muertes a les qu’hai que sumar otros 21 acidentes de calter grave -dos nos desplazamientos al trabayu-
Nel mesmu periodu del 2019 tuvimos que llamentar la muerte de dos persones, lo que quier dicir que nesti añu el porcentaxe d’acidentes fatales medró nun 300%.
Llucía F.M.
This work is licensed under a Creative Commons Attribution 4.0 International License.
