Los emplegaos entamaron darréu les movilizaciones pa reclamar un plan de futuru que yos asegure’l caltenimientu’l so puestu de trabayu
El 17 d’Agostu yera la fecha másima que tinía l’alministrador concursal pa presentar un plan de viabilidá pa Vauste. Trescurríu el plazu llegal de dos meses, a día d’ayeri el Comité d’Empresa nun recibiere dala comunicación al respeutu. La fuerte incertidume sobre’l futuru de la empresa vióse agraváda cola rotura, el pasáu 5 d’Agostu, del contratu de soministru que Vauste tinía con Tenecco. El fondu d’inversión DSA –propietariu de Vauste de magar la so compra a Quantum Capital Partners en 2019, afirma que la planta «tien futuru y viabilidá», pero nun presenta un proyectu concretu qu’avale esa información.
Los trabayadores de Vauste, que ya albidraben que daqué asina podría pasar teniendo en cuenta los antecedentes, nun entardaron nin un día en tomar midíes y la mesma nueche que finaba’l plazu entamaron los sos actos revindicativos; en concreto, prendieron una barricada na carretera d’acesu a la RTPA, reclamando l’atención d’esta entidá sobro’l conflictu. Nel alrodiu apaecieron tamién dellos pasquinos con información del conflictu llaboral.
Redaición InfoAsturies
This work is licensed under a Creative Commons Attribution 4.0 International License.
