Les caberes selmanes dexaron una imaxen llaceriosa d’Asturies, atascos, coches aparcaos perdayuri, pueblos, playes y montes masificaes, basoria… la descomanada afluyencia turística afalada pol “efeutu llamada” creau a entamos de branu pol propiu Gobiernu d’Asturies tornóse nuna menacia pal entornu ñatural, estrozando vies que nun taben preparaes pa tal cantidá de visites, saturando los servicios de pueblos y villes y complicando asgaya la vida nes fasteres rurales y costiegues, llegando a impidir l’acesu a los llugares de trabayu de munchos vecinos, ensin escaecer el xabaz espardimientu del andanciu en fasteres nes que la gran mayoría de la población pertenez por edá a los grupos de mayor riesgu.

Denuncien que les polítiques de Barbón son “pan pa güei y fame pa mañana”, dexando agora a la población llocal coles consecuencies y restriciones derivaes del descontrol turísticu.

L’actual Llei de Turismu ye la redautada pol PSOE nel añu 2001 y ya entós, acordies Andecha Astur, taba atrasada no que cinca a proteición de los espacios y la población afeutaos.  En sostitución d’ella, A.A. propón una Llei de Turismu Caltenible qu’afale’l turismu de calidá, “afitáu nel respetu a la población llocal, al mediuambiente y a la identidá d’Asturies, poniendo en valor el fechu diferencial, afalando prestaciones d’alta calidá y fuxendo de la masificación”.

La midía más novedosa de les presentaes ye la regulación d’un impuestu del turismu caltenible, o ecotasa, asemeyáu al que ya esiste en munchos países europeos, incluyendo dellos territorios del estáu español y qu’aplicáu a los residentes n’agospios turísticos valga pa cubrir los gastos públicos qu’acarreta l’actividá d’esti seutor. Los fondos recaldaos por esti mediu diríen destinaos al mesmu llugar onde se xeneren y con ellos, amás de cubrir gastos estra, podríen valir pa poner en marcha proyeutos d’interés llocal, comu la recuperación y revalorizqación d’espacios emblemáticos, diversificación   del modelu económicu, recuperanza del paisax agrariu, proyeutos de formación, I+D+i o de transición enerxética.

Consideren de vital emportancia regular un modelu turísticu compatible cola proteición del mediuambiente y respetuosu col modelu cultural asturianu y les formes tradicionales de vida y produción, controlando que l’actividá turístico nun perxudique les posibilidaes de vivienda de los asturianos y empareyando les polítiques turístiques con otres qu’afalen el comerciu llocal ya’l consumu de productos asturianos. Los drechos llaborales de les trabayaores del seutor ye otru de los aspeutos a regular, ya que ye persabío que’l turismu xenera emplegos precarios, de baxa estabilidá y calidá.

Nuria Prendes