La concentración, que tuvo llugar delantre la sé de la “Fundación Princesa de Asturias”, desendolcóse con normalidá pesi a la fuerte presión de los cuerpos de seguridá del estáu

El movimientu #AsturiesNunTienRei fizo ayeri n’Uviéu la so tercer concentración antimonárquica de magar la visita de la familia real española a Asturies. Nesta ocasión la convocatoria foi delantre la Fundación Princesa de Asturias, al par d’El Reconquista y de la comisaría de policía. Si nes anteriores convocatories nun hebio dalu problema, l’allugamientu d’esta debió resultar incómodu a Dellegación del Gobiernu, a xulgar pol descomanáu despliegue policial. L’apaición de delles furgonetes de la policía y la irrupción de más d’una decena de policies pente los congregaos anantes del aniciu de la concentración tensó l’ambiente y fexo dudar de la cellebración del actu. Los axentes llegaron a recoyer con actitú belixerante la documentación de cerca de 40 persones d’ente los presentes, lo que disuadió a dalgunos de los participantes, que siguieron l’actu dende la distancia.

Finalmente, los concentraos continuaron col programa previstu, desplegando una pancarta col llema “Asturies nun tien Rei” y  lleendo un comunicáu nel que se desplicó l’orixe ya envís de la Fundación Princesa de Asturias, el so venceyu coles cúpules capitalistes y facistes, el coste económicu que tien pa los asturianos (cercanu al millón d’euros añal) ya’l so papel de fomentu artificial d’una  rellación pente la Corona d’España ya un pueblu asturianu que nun la quier.

El comunicáu foi interrumpíu n’abondes ocasiones pa glayar conseñes en contra la corona española y la represión, conseñes que se continuaron glayando demientres más de media hora depués de finalizada la lletura.

Comu dispidía, recordóse a tolos asistentes la emportancia de participar nel manifestamientu convocáu nel Díi la Nación Asturiana por esti mesmu coleutivu y que tendrá llugar en Xixón a les 12:30 del mediudíi, con salida na Plaza del Humedal.

Nuria Prendes

This work is licensed under a Creative Commons Attribution 4.0 International License.