Xusto 48 hores depués de la so receición el PSOE de Llanes anunciaba’l so sofitu a la ecotasa propuesta

Toles  Cases Conceyu d’Asturies recibieron una propuesta  d’Andecha Astur pa que pidan al Gobiernu Asturianu la tramitación urxente d’una Llei de Turismu Caltenible, con ecotasa, que sostituya a la Llei 7/2001 de Turismu que firmare Tini Areces va cerca de venti años, y que ya entós yera insuficiente a xuiciu d’A.A, qu’entamó entós una campaña al respeutu.

La masificación turística carecía esti branu ya’l descontrol dafechu del mesmu xeneró abondos problemes de convivencia y caltenibilidá nos conceyos que recibieron más visitantes, afeutando  bultablemente a los sirvicios públicos básicos que les Cases Conceyu ufren a la ciudadanía y torgando cola so presencia’l normal desendolcu de les llabores de los vecinos. El fechu ye más grave al sumar el pelligru pa la salú qu’implicó esta afluencia masivo en plenu andanciu, comu’l  propiu Gobiernu de Barbón se vio forciau a almitir a última hora.

La nuea norma propuesta pola formación nacionaliega recueye al detalle una riestra de midíes que definen un nueu modelu turísticu, nel que la presencia de visitantes nun seya una carga pa los vecinos. La idega base ye corresponsabilizar al turista cola prestación de los sirvicios que recibe y col caltenimientu de los bienes ñaturales, hestóricos y culturales de los qu’esfruta, asegurando la compatibilidá de la so presencia coles actividaes tradicionales, la identidá ya’l desendolcu normal de la vida nos nucleos que los reciben.

El conceutu d’ecotasa, vixente ya en dellos llugares d’Europa y del Estáu Español, aplícase a les estancies turístiques ya’l so importe aplícase integru a atender con elli los gastos públicos xeneraos pol seutor turísticu, repercutiendo nes arques públiques. P’Asturies, Andecha pidi’l compromisu de dedicar los fondos recaldaos cola ecotasa a “recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxética”.

Otros de los puntos fuertes d’esta propuesta de llei ye’l control d’alquileres illegales, el control de les viviendes de manera que nun amenorgue les posibilidaes d’acesu a les mismes de los asturianos  y la garantía de cumplimientu de los drechos llaborales nel seutor, finando cola precarización que lu carauteríza. Amás, na so estensa redaición, recueye midíes pa favorecer pente’l turismu el consumu nes fasteres, especialmente de productos propios, promover na actividá turística midies pa la conocencia de la llingua y cultura d’Asturies y pa torgar la contaminación por residuos y la degradación paisaxística, pente otres.

Agora alcuéntrense a la espera de rempuesta por parte de los conceyos, pero amósense ilusionaos ya esperanzaos col proyeutu, que consideren imprescindible tener desendolcáu pal branu del 2021, ya que darréu la so propuesta sintieronse voces d’otros partíos na mesma llinia ya inclusu l’alcalde de Llanes, el socialista Enrique Riestra, posicionóse públicamente a favor de la ecotasa a los dos díes de recibila.

Nuria Prendes

This work is licensed under a Creative Commons Attribution 4.0 International License.