El desaniciu de puestos de trabayu n’Asturies continúa, pesi al repunte estacional del seutor servicios y xorrez el númberu de paraos y paraes ensin dala prestación
El mes d’Agostu preslló con 77.298 persones en paru, ello ye, 335 desemplegaos menos que’l mes anterior, pero con 11.808 más que nes mesmes feches del 2019. En total, nel momentu en que se recoyeron los datos había n’Asturies 363.791 persones afiliaes a la Seguridá Social, seique’l fin de la temporada braniega, especialmente fuerte esti añu por mor de la masificación turística, fae albidrar que les cifres del mes qu’entra sedrán llacerioses.
Sicasí, la perda de puestos de trabayu nun ye lo único qu’esmolez a los sindicatos, la alta temporalidá y la estrema precarización de los trabayos esistentes caltién a munchos asturianos perbaxo la llende la probitú incluso trabayando. Namás un 7’7% de los contratos roblaos el mes de Xunetu foron indefinios ya un altísimu porcentaxe teníen una duración inferior o igual a un mes. Pente los paraos, cerca de 43.000 de los rexistraos nun reciben denguna prestación económica.
Los menores de 25 años -única franxa d’edá na que’l paru subió esti mes- y les muyeres siguen siendo la estaya de la población más afeutada, tantu pol desemplegu cómu pola precarización llaboral.
Redaición InfoAsturies
This work is licensed under a Creative Commons Attribution 4.0 International License.
