Xabel Díez, 5 vegaes Campión individual d’Asturies de Bolu Batiente, 4 vegaes Campión d’Asturies por Pareyes, 3 vegaes Campión d’Asturies de la regularidá -lliga añal que podría tornar a algamar esta selmana- 4 vegaes Socampeón y otres 2 terceru nesa mesma lliga, ganaor cola Peña bolística El Portiellu d’Avilés d’un Campionatu d’Asturies por peñes de Batiente… un curriculum dificil d’igualar -namás hebio otru rapaz na hestoria qu’algamare los 5 campionatos y ya nun ta n’activu- pero qu’elli entá cuenta superar con un títulu más
Acabes consiguir el to quintu Campionatu d’Asturies en Batiente ¿Qué se siente al algamar esti títulu?
L’arguyu ye másimu cuando unu participa en cualesquier actividá, cuando fina una carrera, cuando cuma un monte pero n’esti casu ye daqué especial que tá cargáu d’historia, pienses que antes que tú hebo paisanos xugando durante 1000 años nel to país que foron calteniendo esa tradición pa que un día llegares tú y yos rindieres un fonderu homenaxe faciéndolo lo meyor que pudiste.
Llevaba 4 años detrás d’esti títulu, dende que gané el cuartu na bolera “la ponte”, aquel foi el que más ilusión me ficiere porque ye la bolera más antigua, guapa y representativa de la batiente, y sí, la instalación deportiva más antigua d’Asturies.
Agora faltame algamar el tornéu d’Ases nel que la suerte y la pericia de los miós rivales nunca me dexó trincar, a ver si antes de xubilame s’apiaden y me dexen ganar ún.
D’ente tolos esportes escoyiste los bolos, ¿Porqué?
Lo de tar nos bolos dase por dos causes principales, la cimera ye porque encántenme y la segunda y non menos importante ye el fechu de seguir puxando pa dalos a conocer y evitar el so escaecimientu.
Entame a xugar a los bolos en Pendueles (Llanes) porque la mió familia paterna ye d’ellí, el primer xuegu bolos ficiéronmelu ente mió pa y mió güelu, xugaba nel branu al bolu palma, otra modalidá preciosa, y tando n’Avilés, soi d’ehí, nel 93 abrieron una bolera de batiente na zona onde xugaba colos collacios, esa bolera que agora’l ayuntamientu d’Avilés nun pon más que trabes pa echar una partía, ye la culpable de la mí afición a la batiente.
¿Qu’estrema la batiente d’otres modalidaes de bolos?
La batiente estrema de les otres modalidaes de bolos na fuercia, ye un deporte per téunicu pero nel que amás hai que tener en cuenta el factor fuercia ¿lo malu? Apaecen muncho enantes les lesiones y per ende la edá de xubilación d’esti deporte, la mayoría de les otres modalidaes de bolos son de derribu, trátense de valtiar los bolos, n’esti casu ye un “pasabolu”, nun val con derribalu sinón que hai que pasalu d’alguna marca o como na batiente, una muria a la que llamamos “Ciebu” o “la Cieba”. Dícen d’ellos estudios que trátase de la modalidá más vieya del nuesu país, tien xacíu pues la cancha de xuegu yera el caxón que faen les propies caleyes)
¿Cual ye la situación actual d’esti esporte?
La situación actual ye crítica, tamos peor que nunca, y salvamos sobre tou pol trabayu que fae Fernando, un mayestru de educación física nun colexu de Pravia que nun para de xenerar cantera, entusiasta de los bolos, gran xugaor, gran persona y qu’agora tien un fíu empobináu en poneme les coses ca vez más difíciles na bolera, de fechu, pa mí hubiere sido el xustu campeón el pasáu Domingu, pero la suerte aliose conmigo, cosa de la cual, allégrome.
¿En cuantu a la repercusión mediática de la batiente? Nula, n’Asturies tou lo que nun seya fúbol ta nun segundu planu, y si ye deporte tradicional ya pasamos al ostracismu.
Va años que “La Nueva” y “El Comercio” son enemigos de tou lo que fieda a cultura y tradición, nun hai más que güeyar los artículos d’opinión sobre la llingua onde tienen un puestu d’honor los faches del “club de los Viernes” ¿van mirar esos pola cultura asturiana.
¿Qué midies podríen dar puxu a los bolos y aidar a crear afición?
Obviamente una mayor presencia nos medios y un sobre tou un buen programa educativu onde les escueles afondaren na cultura de nos sedría un bon pasu pa nun dasaniciar el camín andáu pero bonu, tan dexando cayer los horros que traen el so ansiáu turismu, imaxina lo que con perdón, CAGUEN pa los bolos.
*Pa más información, visitar la paxina web bolosbatiente.es; actualizase semanalmente.
This work is licensed under a Creative Commons Attribution 4.0 International License.
