“Solo hai una solución clara y realista: una alternativa republicana que convierta en protagonista a la clas trabayaora, que reconoza los drechos de los Pueblos y que dexe atrás un sistema capitalista que mos ta conduciendo a la devastación planetaria” – Comité pola Amnistía-
“Sabemos qu’Asturies tien futuru ensin monarquía española… Tenemos ganes, tenemos ilusión, tenemos manes pa llevantar Asturies”. Con eses pallabres resumía Alisa, representante de les asociaciones de Mocedá participantes na convocatoria, l’espíritu de la manifestación que percorrió na mañana del 8 Setiembre peles cais de Xixón, una cellebración na que destacó l’abondosa presencia de xente mozo combativo en comuña colos veteranos de tol movimientu social y obreru asturianu.
Aparte de la bona participación cola que cuntó el manifestamientu y posterior lletura de comunicaos, lo que definió esti ochu Setiembre foi la xunidá ya’l trabayu en comuña d’estremaes organizaciones, daqué qu’apurrió bayura y conteníu a esti díi, siempres revindicativu, pero qu’esti añu supo abarcar la práutica totalidá de les vindicaciones del pueblu asturianu.
Nel discursu, marcáu pol fuerte deseyu d’un futuru estremáu p’Asturies “decidíu polos asturianos y asturianes” hubo pallabres pa los conflictos llaborales actuales, la oficialidá ya identidá asturianos, los presos políticos, la llucha LGTB, la defensa del mediu ñatural, la mocedá, la emigración, la refuga de la Costitución española, la llucha de clases y la necesidá de finar col actual sistema económicu, el drechu d’autodetermín de los pueblos, la solidaridá y la memoria.
Esta cabera foi en cierta mena el filu conductor de tol discursu, lo que los asturianos nun escaecerán y la guia que yos valdrá pa saber quien ye quien. Especialmente emotives nesi sen foron les pallabres de la representante de FAMYR, qu’entamó la so intervención colos nomes de los lluchaores antifacistes pa los que siguen buscando reconocimientu oficial y especialmente dures les de Llucía Fernández, d’Andecha Astur, acusando a la monarquía española de ser heriedera del franquismu y a la Costitución española de ser ” la ma de toles mentires y tolos trucos usaos pol sistema p’adormecer los conflictos de clas y pa llevar al movimientu obreru de la llucha digna al sindicalismu pactista”
La memoria presente siempres comu camín a un meyor futuru, porque, comu recalcó el voceru de Darréu “Asturies quier llibertá. Somos un pueblu honráu de xente trabayaora, que sabe ser solidario con tolos pueblos de trabayaores y que quier poder decidir el so futuru. Somos un pueblu nel que mos reconocemos comu iguales, poro, nenguna monarquía, nin propia nin foriata, mos val comu fórmula de gobiernu”
This work is licensed under a Creative Commons Attribution 4.0 International License.
