Mariano Suárez
Esti Díi de la Nación Asturiana pasaron munches coses. Hebio una misa de Barbón y monseñor. Pero’l fechu más importante foi que’hebio en Xixón, convocáu pola plataforma “Asturies nun tien rei”, el mayor manifestamientu en munchos años escontra l’Estáu español y monárquicu, y por una República asturiana y socialista. Pero ayeri “El Comercio” publicita que tamién asocedió una cosuca: un raposu allegóse al piteru, cubrióse de plumes y púnxose a cacarexar comu si fore un pitón de verdá
Daniel Ripa, secretariu xeneral de Podemos, vieno’l 8 setiembre a Xixón. Comu la prensa diba tar na Plaza L’Humedal convocá por Andecha Astur y los demás organizaores del manifestamientu pol Díi de la Nación Asturiana, pos Ripa citó a los medios un migayín enantes, énte l’edificiu la Gota Llechi. Y ellí dixo que Podemos quería una reforma estatutaria qu’incluya más competencies y la oficialidá.
Ripa acudió en xunetu a la concentración que la plataforma “Asturies nun tien rei” fizo n’El Náuticu pa refugar la cabera visita de los Borbones a Asturies. Ripa tuvo en setiembre na concentración que ficimos énte la “Fundación Princesa d’Asturies”, onde vio, ensin pidir cordura, cómu la policía torgaba’l drechu a manifestase ya identificaba asistentes indiscriminámente. Tuvo ellí, discretu y calláu, comu si compartiere los motivos d’aquelles movilizaciones.Y Ripa, arrodiáu d’una pequeña corte de los suyos, tuvo tamién nel manifestamientu que ficimos el díi 8 en Xixón.
Cuandu ún s’apiega a l’Asturies que vindica un futuru con república, llibertá, xusticia social y socialismu pa la nuesa nación, paez que se ta posicionando solidariamente con eses vindicaciones. Paez que ye ún más de les asturianes y asturianos que, énte la pasividá de los partíos parllamentarios, salieron el 8 setiembre a la cai a defender los drechos d’Asturies comu clas trabayaora y comu Pueblu.
Pero resulta que nun ye’l casu de Ripa. Él nun ye ún de nós, magar que perfaiga por paecelo. Ripa hai años que renunció al compromisu que tuvo cola llibertá de los Pueblos del Estáu, que defendió cuandu de mozu vivió n’Aragón.
Podemos agora convoca a la prensa faciendo’l llabor de la contra, pa tapar los glayíos asturianos y vindicativos del 8 setiembre. Podemos nun quier que se note qu’hai una Asturies confrontá tanto cola esplotación capitalista de la clas trabayaora comu col Estáu español y monárquicu, una Asturies que nun dobla y llucha pola república y un socialismu de veres.
Podemos vieno’l 8 setiembre a Xixón a tapar mediáticamente les nueses voces, intentando paecer ún de nós. Ye más, pa esti posturéu Ripa fasta mudó la ropa: foi de camisa blanca a la rueda prensa y, a la media hora, apaeció de camiseta nel manifestamientu. Pero ¿qué pidió énte la prensa? Podemos presentóse pidiendo más Estatutu, cuandu en Xixón unes venti organizaciones posicionémosmos escontra la Costitución española y l’impuestu Estatutu d’Autonomía. Podemos nun quier qu’a Asturies-y quiten les cadenes (Estatutu), nón, sólo pide unes cadenes un pelín más llargues (dalguna competenciuca más). ¿Ún que sólo pide cadenes más llargues quier lliderar la lliberación de los esclavos?
Podemos nun tien n’Asturies denguna soberanía política, ye la voz del so amu en Madrid. Y Podemos, comu partíu español que ye, nun defende lo mesmo que l’Asturies que se manifestó’l 8 setiembre. Nun quier frañer y superar esti Estáu español monárquico-capitalista. Sólo quier que los mecanismos de control sociopolíticu d’esti Estáu rinchen menos n’Asturies.
Nel casu de Podemos, Linneo nun tendría dubies pa clasificalu na so tasonomía: tamosénte un raposu que se mazcarita de pitón, cuandu nun ye más qu’un collaboraor del sistema, encargáu d’enfriar los movimientos de rempuesta popular y, en consecuencia, de defender el réxime español y monárquicu vixente. Por dalgo tienen en Madrid ministros del rei.
¡Curiáu col raposu!
This work is licensed under a Creative Commons Attribution 4.0 International License.
