Ayeri manifestáronse per Uviéu alredor d’un millar de trabayadores del espectáculu y los eventos col enfotu de visibilizar la difícil situación que traviesa’l seutor
La estaya de la cultura, eventos y espectáculos ye una de les más afeutaes, tanto pol confinamientu como poles posteriores midíes de seguridá sanitaria. Miles de conciertos, eventos, actividaes llúdiques y culturales fueron suspendíos y los pocos que pudieron cellebrase tuvieron de multiplicar los gastos en prevención de la qu’amenorgaben l’aforu, una ecuación poco rentable.
La vulnerabilidá del seutor ta fora de toa dulda; sicasí, trabayaores y empresarios acusen una falta de reconocencia de la so situación y reclamen la puesta’n marcha de midíes concretes y urxentes per parte’l gobiernu que desanicien la so crisis.
Pa faer visibles les sos reivindicaciones, entamaron una campaña de protestes que, sol llema “Alerta Colorao, faemos Eventos” anubrió esta selmana les redes y ayeri les cais. En concretu, una manifestación de más d’un millar de persones percorría na tardi d’ayeri les cais d’Uviéu colos bártulos propios del so oficiu, desixendo que se busquen soluciones que-yos permitan caltener la so actividá y el so emplegu, encamentando al gobiernu a tomar midíes urxentes nes selmanes vinientes pa garantizar la supervivencia del seutor, amás de crear darréu una mesa seutorial que defina les necesidaes del mesmu, afeutáu pola estacionalidad ya intermitencia de l’actividá.
Llucía F. Marqués
This work is licensed under a Creative Commons Attribution 4.0 International License.
