Les families enterábense por una carta remitida pol direutor, Mikel de la Torre, na que informaba de la imposibilidá d’entamar el cursu de manera segura y nes condiciones garantizaes por falta de recursos “Nun pueo ser cómplice de lo que se nos tá obligando a facer pa organizar el cursu nel Colexu”. Los pas y mas del Atalía comprendieron y sofitaron dende’l primer intre la decisión, sofitándo al cientru con recoyida de robles y pancartes nel esterior del mesmu.

Güei, ante la certeza de que les sos demandes nun sedrán atendies a tiempu, l’AMPA del C.P. Atalía deciden convocar a les families del cientru en movilización pa que s’atiendan al menos les dos midíes d’urxencia que riquieren, ello ye,  que se cubran les baxes y se cumpla’l compromisu d’unviar docentes d’apoyu que permitan atender los desdobles de clases. La so otra principal demanda, que s’asegure la presencia de monitores n’atención temprana y comedor que cumplan les ratios de seguridá sanitaria desixida, foi atendía na mañana de güei cola incorporación de 3 monitores y un conserxe d’apoyu.

Reconocen qu’hai más demandes, pero “Estos dos puntos son de recursos humanos, el mínimu que pidimos que te cubierto al entamu de cursu xunto coles midies de prevención sanitaries que el colexu ya tien dimpuestes pa entamar les clases”

Poro, mañana martes 22 de Setiembre, piden a les families qu’acuda al colexu a les 9h pero qu’en llugar d’entrar faigan un cordón humanu –calteniendo les distancies de 2m- alrodiu’l cientru.  El colexu informará que los niños que nun asistan a clas sedrá pola protesta, polo que nun cuntará comu absentismu.