Les previsiones más optimistes del INE p’Asturies prevén una perda de 101.436 moraores anantes del 2035, dexando un saldu total de pocu más de 917.000 persones nel país

De cumplise les previsiones del Istitutu Nacional d’Estadística, Asturies, xunto con Llión, protagonizará’l mayor descensu porcentual de población de tol estáu nos prósimos 15 años, perdiendo un diez por cientu ampliu de los sos moraores; entantu, la media estatal esperimentará un xorrecimientu del dos por cientu.

Los cálculos tan fechos suponiendo que se caltengan les tendencies demográfiques actuales, ello ye, que la media de fios por muyer medre progresiva y selemente al alza y que la esperanza de vida algame los 85 años nos homes y los 90 en muyeres. Pesi a esta mayor esperanza de vida el númberu de defunciones continuaría  medrando pol avieyamientu de la población, al tiempu que la mayor tasa de fecundidá nun torna qu’amenorguen les cifres de ñacencies, al haber menos muyeres n’edá fértil, dando un saldu vexetativu negativu demientres tol periodu.

La inmigración tamién sedrá menor n’Asturies (d’un 2’8% frente al 50% de media estatal) que nos restantes territorios del estáu, al ser un destín pocu petecible polos sos niveles de desemplegu y precariedá llaboral.

Llucía F. Marqués

This work is licensed under a Creative Commons Attribution 4.0 International License.