La versión n’asturianu d’esta aplicación de control tuvo disponible dende’l momentu cero, pero denegóse la so activación

Radar COVID ye l’aplicación pal rastréu de contautos pa la covid diseñada y dirixida pola Secretaría d’Estáu de Dixitalización ya Intelixencia Artificial del Gobiernu d’España. Con ella, de magar el 15 de Setiembre, quien la tenga descargada apurre a la empresa que lo xestiona los sos datos d’ubicación, deteutando les presones que tan alrodiu cola mesma aplicación, de mena que te pueden informar en casu de qu’un positivu PCR toviere cerca de tí más de 15 menutos, avisando del posible contaxu.

L’aplicación pue descargase n’español, catalán, gallego, euskera ya inglés, pero non n’asturianu. La desplicación del Ministeriu ye la non oficialidá de la llingua asturiana, lo que lleva a entrugase darréu sobro la oficialidá del inglés en tol territoriu estatal.

Amás, la inclusión de la versión asturiana nun tendría costes estras, yá qu’un de los miembros de Softastur, asociación que tien l’enfotu d’incluyir l’asturianu nes nueves teunoloxíes, tienla preparada dende’l primer intre, ufriéndola pal so llibre usu, a lo que la empresa responsable de la xestión de la mesma ya’l Ministeriu español de Sanidá se nieguen.

Tres de Radar Covid alcuéntrase la multinacional Indra, que s’encarga del so desendolcu. El grupu alxudicóse’l contratu vía procesu d’emerxencia y negociando ensin publicidá la puesta en marcha d’esta teunoloxía, por un total de 330.537,5 euros, sigún se desprende de la resolución del contratu espublizáu pol Ministeriu d’Asuntos Económicos y Tresformación Dixital.

Llucía F. Marqués

This work is licensed under a Creative Commons Attribution 4.0 International License.