La Coordinadora Ecoloxista plantega si los elevaos valores horarios que s’algamaron podríen tar asociaos a la contaminación xenerada pol procesu de coquización del carbón que se fae nes primeres bateríes puestes en marcha de nueu por Arcelor
Los indicaores de partícules, toluenu y bencenu algamaron valores mui perriba de lo recomendable pa la salú humana, acordies los datos oficiales qu’apurre’l Gobiernu d’Asturies ya’l Conceyu Xixón.
En concreto, na fastera’l Lloredal -la que piores datos apurre del Conceyu, el País y l’Estáu) algamóse un picu de 45 µg/m3 del tolueno a les 11 la mañana del díi d’ayeri, 9 vegaes más de lo que l’axencia de proteición del mediu ambiente (EPA) considera comu concentración de referencia pa esti químicu, perriba de la que la so concentración tien efeutos sol sistema neurolóxicu.
Nel mesmu midior algamáronse valores de 203 µg/m³ a las 24 horas por partícules Pm10, cuando’l nivel d’alerta ta en 50 µg/m3 nivel qu’en Xixón va superándose 42 vegaes no que va d’añu. Arriendes d’ello coincidiendo colos picos de les partícules rexistráronse incrementos del bencenu, sostancia especialmente pelligrosa por ser canceríxena.
La esposición a la contaminación del aire tá asociada también col incrementu d’enfermedaes respiratories y cardiovasculares. La población que vive’n condiciones de vulnerabilidá, los menores de cinco años, los vieyos y les persones con enfermedaes previes son los que más carecen les consecuencies. La OMS, estima que cerca de siete millones de muertes al añu son atribuyibles a la mala calidá del aire.
Redaición InfoAsturies
This work is licensed under a Creative Commons Attribution 4.0 International License.
