El Presidente del “Principado” retruca n’español a una entruga fecha n’asturianu la mesma selmana na qu’anuncia la so presencia nel Día les Lletres Asturianes

Llucía F. Marqués

N’Ochobre del 2019 escribía un artículu d’opinión nel que, con tol respetu poles persones que carecen enfermedaes mentales y les sos families, baraxaba la posibilidá de que’l gobiernu’l País tuviere’n manes d’una persona con serios trestornos.

El republicanu comprometíu que lo mesmo cancia la internacional puñu n’altu que sorrie llambión al rei, el defensor cimeru de la llingua asturiana que reniega de la oficialidá, el salvaor de la patria que quixere presllar Asturies pa protexela del andanciu y al tiempu  fae proclames públiques llamando al turismu masivu nel “Paradisu seguru”, l’únicu capaz d’asiellase nel despachu de Belarmino Tomás a roblar la so somisión a un estatutu y a un “Principado” que revolveríen les tripes al hestóricu presidente, Adrián Barbón, vien de protagonizar esta selmana una incongruencia más pa la so coleición.

Cuando-y falen n’asturianu na Xunta Xeneral, nuna demostración pública de falta d’educación y faltosería namás esperable de políticos arguyosos de la so inorancia, Barbón retruca n’español. Persabemos que’l de so nun ye un casu de desconocimientu de la llingua, comu nos amosó nes sos intervenciones n’asturianu a lo llargo’l so mandatu -que nun sumen diez menutos pente toes, pero que tan ehí- y de fechu les primeres pallabres dieron la impresión de que diba contestar n’asturianu, pero non; en señal d’aquiescencia y respetu a los diputaos de VOX (que-y lo agradecen publicamente) camuda darréu al español.

Güei, pa compensar, apaecerá nes semeyes del Día les Lletres Asturianes. Faciéndo oyíos sordos a les voces que fuera’l Campuamor -y probablemente dientro- desixen la Oficialidá, eso si, pero ellí tará, pa gociu de llambeculos y fotógrafos. Porque asina ye’l nuesu presidente, val pa tou, sabe nalar y guardar la ropa, pero ensin moyase nunca.

O tien un trestornu mental, o créese mui llistu… y a nosotros mui tontos.

This work is licensed under a Creative Commons Attribution 4.0 International License.