El problema de la fienda dixital nun ye nuevu, malque rescampla sanguinamente de magar l’empreslle. Los trabayos pa casa, los deberes, les llabores n’equipu, los vidios que tienen que ver… mesmo anantes de tola situación prevocada pol andanciu, el sistema educativu obviaba la esistencia d’escolinos ensin medios teunolóxicos, xenerando una situación que si ya anantes yera inxusta, agora ye inadmisible
Cuenta rápida. N’Asturies hai alrodiu 70.000 escolinos d’infantil y primaria más otros alrodiu de 50.000 n’estudios de secundaria. Con una tasa de probitú del 21%, podemos calcular a grosso modo unes 25.000 families con dificultaes pa cubrir les sos necesidaes básiques, que poro tendrán complicao tener los equipos informáticos y conesiones a interné que se yos desixe a los escolinos.
Los estudiantes de secundaria tienen la obligación de seguir por interné les clases a les que nun asistan de manera presencial, ello ye, la metá de los díes, ya que’l cursu ta dándose’n díes alternos. Los de primaria namás en casu de cuarentena de la so clase. La falta d’equipos súmase a la descomanada “zona blanca”, ello ye, superficie habitao ensin cobertura d’interné, un problema qu’algama a 3.464 llocalidaes, afeutando a una población de 207.452 asturianos. Pero nun vos esmolezais, el “Principado” vien de dotar a los cientros de menores públicos con cerca d’un centenar d’ordenadores, en concreto, 80, que ya tan furrulando en 7 cientros de menores públicos, con un total de 150 escolinos, pa solventar la brecha dixital, asina que too solucionao.
Llucía F. Marqués
This work is licensed under a Creative Commons Attribution 4.0 International License.
