La Plataforma Contra la Contaminación de Xixón entamó ayeri coles primeres de les aiciones que tienen preparaes pa desendolcar a lo llargu’l mes comu protesta y concienciación del grave problema de contaminación ambiental que carez la ciudá

Carbón apináu en puertu y nes sableres, agües fediondes y arramaos, Arcelor cuspiendo fumu a tou meter y unos niveles de bencenu, toluenu y partícules Pm10 intolerables pa la salú humana. La situación ambiental de Xixón ye d’emerxencia, pero la ciudá lleva tantos años nestes condiciones que munchos de los sos moraores asumen comu normal los fedores qu’anubren les cais, la ropa qu’apaez puerco depués de tendelo fuera y los coches y ventanes qu’alborecen con una capa de povisa grasiento d’un díi pa otru.

Poro, pa la Plataforma Contra la Contaminación de Xixón ye fundamental salir a la cai a concienciar del problema, faciendo ver que les consecuencies de lo que ta pasando van pa llargo y denunciando l’actitú negacionista del Conceyu Xixón, emperráu en nun almitir la gravedá de la cuestión.

Comu primer actuación de la campaña ayeri dellos miembros de la Plataforma percorrieron la ciudá con caretes blanques, camisetes de denuncia y cartelos alusivos. A los que los alcuentren nel so camín, piden que collaboren na campaña subiendo les sos semeyes a les redes col hastag #OctubreNegro #OchobrePrietu.

Redaición InfoAsturies

This work is licensed under a Creative Commons Attribution 4.0 International License.