Amás de participar nes actuaciones a pie de cai entamaes pol coleutivu “Asturies nun tien Rei”, Andecha Astur presentó una riestra d’aniciatives al Congresu, a la Xunta Xeneral y a los principales conceyos asturianos pidiendo que dexen de financiar con dineru públicu la Fundación Princesa

La formación nacionaliega, que ye la única organización política asturiana incluyía n'”Asturies nun tien Rei”, decidió treslladar al tarrén oficial les propuestes recoyíes fasta agora na cai, llevando al Congresu español,  la Xunta Xeneral y les Cases Conceyu d’Uviéu, Xixón y Avilés una batería de propuestes

Nel congresu, la propuesta foi presentada pol  diputáu Oskar Matute, de la coalición “Agora Repúbliques”, a la que pertenez Andecha Astur. La entruga fecha al  al Gobiernu español de PSOE-Podemos foi “¿por qué, si bixordea de progresista, nos caberos seyes años se sovencionó a la Fundación Princesa con 1.800.000 € (300.000 €/añu)? y “¿fasta qu’exerciciu fiscal PSOE-Podemos van siguir regalando eses sovenciones a la Fundación?¿nun tienen plan d’invertir tales cantidaes nes necesidaes sociales urxentes que tien el pueblu trabayaor asturianu en materia de sanidá, educación, vivienda o política llaboral?.”

Nel ámbetu asturianu, Andecha Astur pidió a tolos grupos parllamentarios asturianos l’aprebación d’una resolución pal acabu les sovenciones que la Xunta Xeneral y el Gobiernu d’Asturies dan añalmente a la Fundación Princesa.  El total sovencionao por eses dos entidaes a la Fundación propagandística de la monarquía española, en nome del pueblu asturianu, asciende a 986.000 € nel periodu 2014-2019, cuasi un millón  d’euros que podríen dedicase al fortalecimientu de los sirvicios públicos, comu la sanidá o l’enseñu.

Per otru lláu, Uviéu entregó 1.750.000 € nel mesmu periodu, al tiempu que Xixón regaló 270.000 € y Avilés otros 108.000, partíes toes que salieron de los fondos de la ciudadanía y qu’Andecha Astur pidi que tengan meyor destín. “Son presupuestos públicos arrampuñaos a la clas trabayaora asturiana per aciu los impuestos, que deberíen dedicase a sirvicios públicos básicos”.

Estes cantidaes del presupuestu públicu asturianu súmense a la parte proporcional que sal d’Asturies pa pagar añalmente los cerca d’ocho millones d’euros que la Familia Rial Española recibe añalmente de los Presupuestos Xenerales del Estáu.

Andecha Astur aprofitó la ocasión pa recordar que la “Fundación Princesa, llamentablemente allugá n’Asturies, nun ye más qu’el preséu de la corona española pal desendolcu la so política de propaganda. Y que’l so Patronatu ta integráu por representantes de grandes corporaciones bancaries y empresariales, comu Arcelor Mittal, BBVA, Bancu Sabadell, Corporación Masaveu, Abengoa, Liberbank, Hidrollétrica’l Cantábricu, Alsa, Bancu Santander, Corporación VIPS-Sigla, asina comu por miembros de la ñobleza española, todos ellos presonaxes ya entidaes ñidiamente enfrentaos a los intereses del pueblu trabayaor asturianu”.