El Serviciu Públicu d’Emplegu del “Principado” quier buscar la manera de “revitalizar el mediu rural al traviés de l’adautación de les actividaes económiques tradicionales del campu y la montaña asturianes al sieglu XXI”. Pa ello nun van entamar poniendo en prautica les midies evidentes que los propios moraores lleven décades solicitando, nun van buscar soluciones col so equipu de gobiernu nin van invertir el so presupuestu en reactivar la economía llocal; tampoco van contratar un equipu d’economistes asturianos conoceores de les peculiaridaes de la cultura y la economía rural asturianes, sinon que va contratar, por cerca de 30.000€, a una empresa madrileña, Arenal GC

Pa entamar, la consultora dedicará un tiempu a conocer la situación del mediu rural n’Asturies, les ocupaciones reales del seutor y analizar les venceyaes al seutor primariu “pa conocer les necesidaes formatives de calter inmediatu”. Ello da una pista de les primeres propuestes que surdirán de la consultora: formación en nueves teunoloxíes pa la xente de los pueblos -recordemos, con una media d’edá superior a los 65 años-.

Otra de les vies a estudiar sedrá “l’adautación de les actividaes económiques tradicionales del campu y la montaña asturianas al sieglu XXI, la recuperación d’ocupaciones perdies o en riesgu d’estinción, y la propuesta de nueves ocupaciones non tradicionales suscetibles de implantase nel mediu rural gracies a les nueves teunoloxíes y les meyores nes comunicaciones ya infracadarmes”. Tou ello perfecho y per otru llau evidente.

Sicasí, si se quier que seya efeutivo ye imprescindible sentir lo que tienen que decir al respeutu los que viven elli. Ayeri mesmo los vecinos de Ponga reclamaben: nun pueden llamar siquiera por teléfono al 112. En 41 conceyos la metá del territoriu nun cuenta cola cobertura mínima d’interné. Los productores de Peñamellera Baxa llancen un SOS “Les restriciones burocrátiques son desesperantes; nun quieren que mos vaigamos de les zones rurales pero too son trabes”. Meyores comunicaciones, tanto físiques comu teunolóxiques, acesu a los mesmos servicios que nes zones urbanes, axilización de la burocracia, aprofitamientu del campu y rentabilización de les esplotaciones, son reclamaciones repeties pola población rural fasta la fartura.

En cualisquier casu, la empresa Arenal GC tien esperiencia nel tema y pretende apurrir soluciones concretes y aplicables pa dar puxu a la economía rural asturiana y torgar el despoblamientu. Si lo consiguen, un aplausu pa ellos, igual teníemos que votalos pa les prósimes elleiciones ya que van facer, lliteralmente, el trabayu del gobiernu. Y igual fasta cobren menos.

Llucía F. Marqués