¿Qué relación ves ente la esistencia de presos políticos y l’ actual sistema monárquicu?

De primeres,  habría que remarcar que n’España nun hubo un solu día ensin presos políticos dende 1939, ensin cuntar los aprosimao 30.000 presos políticos de la insurrección asturiana de 1934, que darréu foron lliberaos pola Amnistía llevada a cabu pol Frente Popular.

A partir del golpe d’Estáu de Xunetu de 1936 contra’l gobiernu del Frente Popular, surde la guerra civil que preciede a los 40 años de facismu abiertu que supunxeron una represión y una esplotación brutal contra tol movimientu obreru y revolucionariu. Mientres los años de la transación política, el réxime viose obligáu a reformar l’Estáu para ampliar la so base social y poder entrar dientro de la Comunidá Económica Europea y darréu de la OTAN, pos nun podía formar parte d’elles siendo formalmente una dictadura fascista.

Naquellos años el movimientu obreru y revolucionariu en tol Estáu yera bien potente, lluchábase por echar embaxo’l réxime y por una rotura, cosa qu’a la fin nun foi asina, pero nun vamos entrar tampoco en munchos detalles al respeutu porque eternizaríamos…

Nomaron a Juan Carlos como sucesor de Franco, xurando fidelidá a los principios fundamentales del movimientu, y ésti designaría a Adolfo Suárez como Presidente del Gobiernu en 1976. Nun hai qu’escaecer que Suárez tamién yera un home del réxime, non un opositor.

Otra cuestión clave d’aquella dómina foi que la naturaleza del Estáu nun camudó y tolos poderes económicos, militares, xudiciales, políticos, etc., siguieron nes mesmes manos o nes de los sos descendientes. La inmensa mayoría de l’hasta entós oposición política (PCE, PSOE, CNT, etc.) pasa pel aru, camuda los sos estatutos ya intégrase nel réxime, y la disidencia restasti que s’oponía a la maniobra de la transición (fundamentalmente’l movimientu abertzale, ETA, el Partíu Comunista Reconstituyíu y los GRAPO) son víctimes de la brutal represión y condergaos a la clandestinidá. Hubo organizaciones y partíos políticos como’l PCE (r) qu’enxamás fueron llegalizaos, precisamente por denunciar aquella farsa y pola so praxis revolucionaria. L’Amnistía parcial que decretó’l gobiernu lliberó a cientos de presos políticos, pero hubo concretamente 14 qu’enxamás fueron lliberaos, y amás, a los pocos meses volvía haber más presos qu’enantes, curiosamente, la mayoría, por lluchar pola Amnistía. Hai un filu conductor dende entós hasta agora, munchos de los militantes del PCE (r) siguen güei nos cuartones del Estáu, condergaos a una cadena perpetua tapada, como por casu el so Secretariu Xeneral, Manuel Pérez Martínez “Arenas”.

La  única llexitimidá d’esti Estáu, si ye que tien dalguna, procede del golpe d’Estáu de 1936. La relación ente l’actual sistema monárquicu, como lo denomines (que d’actual tien poco, como vimos) y l’esistencia de presos políticos ye absoluta. Antes fusilábasete por oponete al réxime, güei condérgasete a décades de prisión en celdes d’aislamientu, a la desatención sanitaria y a la criminalización más absoluta. Sigue habiendo ensame de presos políticos por lluchar por lo mesmo polo que lo faíen entós, y mientres nun s’acabe coles razones qu’anicien la so propia esistencia, podemos dicir qu’equí nun hai llibertaes polítiques reales pa entamar. La única solución pasa por conquistar una amnistía total pa tolos presos políticos, lo cual ye un primer pasu pa poder establecer un auténticu cambéu de sistema, que pa nós, nun sería otru más que’l socialista.

Asturies ta siendo una de les zones del Estáu con mayor cantidá de rempuesta contra la monarquía. ¿A qué crees que se debe esto?

Pienso que se debe a dellos factores, tanto internos de Asturies como esternos.

Unu d’ellos ye qu’equí hai una fuerte tradición republicana dientro’l movimientu obreru y popular. Magar esi sentimientu nun llogró hasta agora vertebrase en movimientu entamáu, estes respuestes o otres que se dean pueden ser un pequenu pasu al respeutu. Pero pa ello tendríamos que desaposianos de vicios bien enraigonaos como’l proselitismu y el sectarismu,  establecer unes bases comunes programátiques, táctiques y estratéxiques, enfocaes a camudar el modelu d’Estáu, non el gobiernu, romper con toles organizaciones reformistes  y  posmodernes que pa lo único que tán sirviendo ye pa desarmar y estazar a la clase obrera, eslleiendo la conciencia de clase ente la mesma. Ye momentu d’unidá, pero unidá revolucionaria, non astracta, coyuntural nin practicista.

Otru factor ye l’ampliu descontentu social y el creciente descreitu de la Monarquía borbónica, que lo ganó a pulsu. Dicha institución ye una pilastra fundamental del réxime y acabar con ella supondría abrir les puertes pa la instauración d’una República Popular qu’integre a tolos pueblos del Estáu y ponga toes los recursos al serviciu de la clas obrera.

Manifestaisvos baxo’l llema d’ Asturies Nun Tien Rei, personalización del mesmu llema ñacíu n’ Irlanda y adoutáu por tolos movimientos antimonárquicos del estáu. ¿Diríes que la población asturiana siéntese identificada con esi llema?

A nós el llema sí que nos paez acertáu nesi sen. Pero tamién creo, personalmente, que ye un erru quedase a cencielles na negación si lo que se pretende ye construyir un movimientu popular republicanu. Quedase na negación por intentar atraer “al fargatáu”, quedase a cencielles no cuantitativo, pa lo único que pue sirvir ye pa dar respuestes puntuales y que finalmente la xente quéme. Pienso que si realmente quier construyise un movimientu de calter republicanu, hai que da-y conteníu y aldericar lo que seya necesario, hai qu’armalo ideolóxicamente y pasar de la negación a l’afirmación. Amás, creo que les xeneraciones más nueves son y pueden ser bien permeables al discursu republicanu, siempres que se-y dea un conteníu afayaizo.

¿Yera la primer vegada que acudies a los actos de protesta a los Premios Princesa?

Como coleutivu sí yera la primer vegada qu’asistíemos, a nivel personal non. Llevo diendo siquier los postreros 6 o 7 años. Ye una fecha importante pa la movilización y pa reforzar posiciones y pienso que d’una o otra manera hai qu’apurrir el to granin.

¿Cómo visti la movilización?

Primero, tenemos que tener en cuenta como estos últimos años foi a menos, cuantitativa y cualitativamente, y l’organización de la mesma tamién. Partiendo d’eso, y de la situación que tenemos agora col coronavirus, personalmente quedo con que se llevo a cabu y nun se dexó esi espaciu en blancu. Pero si pasamos a otres considerancies, echo en falta una bona coordinación y más iniciativa. Si queremos sacar alantre nueves respuestes y articular el movimientu del que tamos falando, creo qu’eso son coses a ameyorar. Otra manera, quedo con qu’había bastante mocedá y coleutivos de trabayadores en llucha que se xunieron ensin pensa lo y a los que se-yos dio voz.

A lo último, gustaríame comentar que dempués de la movilización contra los Premios Princesa un grupu de persones fuimos reteníos, identificaos y amedranaos pola policía local d’Uviéu Por llevar un palu de bandera abordáronnos, quitáronnos el palu, pegatinas y petardos, dempués de buscar compulsivamente na mochila “hachis o mariguana”. Pol simple fechu de preguntar por que se llevaben les mios coses, un d’ellos menacióme con llevame deteníu y con que me diba a españar a hosties. Amás, dixo que me diba a llegar una multa por desacatamientu a l’autoridá.