El pasáu 16 d’Ochobre acudiste a la manifestación en refuga de la monarquía española. ¿facíeslo a titulu personal o representando dalgún coleutivu? 

Efeutivamente yo tuvi, en representación de Darréu Mocedá Soberanista d’Izquierda, na manifestación del vienres 16 d’ochobre, que ye ún más de tolos actos reivindicativos nos que participé.

Nel manifestamientu resaltaba la presencia de xente, como tú, mui mozo ¿Diríes que la idega #Asturiesnuntienrei tien acoyida por parte la mocedá?

Esti manifestamientu taba marcáu pola entrada d’Asturies na fase 2 y por ello vieno menos xente qu’a otres d’esti mesmu tipu pero sicasí l’ambiente que s’alendaba yera en bonu en llínies xenerales, anque ablucome’l fechu qu’atopamos ciertu refugu de la población uvieína. Había muncha xente mozo repartío pelos bloques, sobremanera, y esto ye lo que m’esmuel, n’aquellos del Partíu Comunista y otres formaciones que podríemos calificar de, por dicilo asina, “españoles”.

Considero qu’esto ye asina porque los ideales republicanos sí tienen muncha acoyida na mocedá (magar que cada vegada menos, baxo’l mio puntu de vista), pero dende l’asturianismu fallamos n’acercanos a la xente xoven; yá seya por culpa enteramente nueso, porque nun usamos les estratexes afayadices, o bien porque’l procesu d’aculturización que tamos viviendo n’Asturies y que s’espeya en munchos aspeutos de la nuesa vida, como na educación, ta yá demasiáu avanzáu como pa que nós podamos facer nada.

De toles formes la sensación que me dexen estos actos ye que nun hai que baxar los brazos y hai que siguir lluchando hasta algamar cámbeos reales, non solo nesti ámbitu, ye dicir al rodiu de la contraposición monarquía/república, sinón en tolos demás que s’engloben en manifestaciones como estes, como’l drechu a decidir, la xusticia de social, la oficialidá de la nuesa llingua llariega, el socialismu… Quiciabes intentando a partir d’agora centranos más en nós mesmos pa fortalecenos y poder afrontar el futuru en meyores condiciones.

Finalmente quixera denunciar la descomanada y claramente vengativa actuación de la policía llocal tres la manifestación; con casos de xente a la que pararon, identificaron, cachearon y hasta multaron pol solu fechu de llevar un palu de PVC de camín a casa.

This work is licensed under a Creative Commons Attribution 4.0 International License.