El movimientu “Asturies nun tien rei” ta sacando a la cai el sentimientu de non pertenencia a la corona española de la mayoría de los asturianos nuna riestra d’actos simbólicos y de refuga qu’entamaron n’Agostu y que tuvieron la so cabera amuesa el vienres 16 d’Ochobre, coincidiendo cola entrega de los Premios Principiegos. Si daqué resalta d’esti movimientu ye la so capacidá pa xunir nun únicu oxetivu común a coleutivos ya individualidaes estremaes nes sos conceiciones d’Asturies, del Estáu y de la sociedá en xeneral, anque toes elles dende un enfoque asturianu de clas; pero ¿Quíenes son estos antimonárquicos? InfoAsturies entrevista a un garrapiellu d’ellos (pa ver les entrevistes completes, calcar nel enllaz)
La primer entrevista ye pa Javi Cueto Álvarez qu’acudió al manifestamientu a títulu presonal y siéntese perfechamente identificáu col mensaxe “Asturies nun tien Rei”, que resume’n 4 pallabres un mensaxe nidiu “Los asturianos y asturianes nun aceutaremos de bon aquel la monarquía y saldremos a la cai les vegaes que faiga falta, nun s’usaran los nuesos impuestos pa caltener una istitución anticuá, corruta y heriedera del franquismu” .
Con 20 años y procedente de Villah.ormes, Javi considera que la mocedá tien de ser el relevu de la viniente xeneración y tien de ser quien te a pie de cai “y non tres d’una pantalla de móvil“. Decidió dir a la manifestación tres de dudar pola situación sanitaria, pero el compromisu de la organización pa cola aplicación de la normativa decidiólu y alcontró a la xente activa y animao “con ganes de demostrar que los reis nun pasearían per Uviéu comu si fore per so casa”. Presto-y que a la refuga de la corona española y de la campaña de blanquiamientu que costitui los premios principiegos se sumare la revindicación social y llaboral. Tamién destaca la importancia de la xunidá pol oxetivu común “denguna organización s’impuso perriba d’otra”.
Yera la primer vegá qu‘Adrián Tuero, xixonés de 28 años, acudía a la manifestación comu parte del Comité d’Asturies pola Amnistía, anque ya fore 6 o 7 años a títulu individual, pa elli ye una fecha importante pa la movilización y pa reforciar posiciones. Sicasí esti añu a la fin de la mesma alcontróse con una sospresa desagradable “después de la movilización contra los Premios Princesa un grupu de persones fuimos retenios, identificaos ya intimidaos pola policía llocal d’Uviéu, por llevar un palu de bandera abordáronnos, quitáronmos el palu, pegatines y petardos, tres de buscar compulsivamente mochila “hachis o marihuana”. Pol simple fechu de preguntar por que se llevaben les mios coses, ún d’ellos menaciome con llevame deteníu y con que diba reventame a hosties. Amás díxome que diba llegame una multa por desacatu a la autoridá”. Elli persabe qu’eso nun foi lo pior que-yos pudo pasar: “n’ España nun hebio nin un solu díe ensin presos políticos dende 1939, ensin cuntar los cerca de 30.000 presos políticos de la insurreción asturiana de 1934“. Na so entrevista fae una interesante revisión a la situación hestórica y actual de los presos políticos nel Estáu y a la relación ente’l sistema monárquicu, el franquismu y la esistencia de presos políticos.
La fuerte tradición republicana obrera y popular, xunto col descontentu social ya’l fuerte descréditu de la monarquía borbónica son p’Adrián los principales factores que faen que la rempuesta asturiana contra la monarquía seya una de les más costantes del Estáu.
Pa Mario Arbesú, noreñense de 42 años y miembru de la Xunta Executiva d’Andecha Astur, la cantidá d’aiciones de refuga a la monarquía y la so bona rempuesta xustifíquense pola fuerte tradición asturiana obrera, d’izquierdes y republicana, pero tamién pol bon nivel de organización popular, destacando’l méritu del alcuerdu pente organizaciones mui estremaes que foron quien a xenerar un clima de confianza pa entamar rempuestes nestos tiempos complicaos. Anantes d’esti manifestamientu y de magar Agostu, Asturies nun tien Rei entamó dos concentraciones en Xixón, una amburando semeyes del rei y otra camudando’l nome de la avenida Juan Carlos I, y otra más n’ Uviéu, delantre la sede de la Fundación Princesa y una campaña de pancartes y pegadielles, seique Mario destaca la participación de la xente na manifestación del 8 setiembre en Xixón, tapecía polos medios de comunicación.
De la manifestación del 16 d’Ochobre, coincidiendo colos premios Princesa, Mario destaca que foi mui digna, anque tuvo mui condicionada pola situación sanitario, les restricciones, el fechu de que los premios se ficieran a puerta pesllada y la confusión creada pola desautorización de la Delegación de Gobiernu de la concentración convocada pol colectivu de la Sanidá delantre d’El Reconquista. Toos esos fechos llevaren a la organización d’Asturies nun tien Rei a convocar el día anantes una rueda de prensa delantre’l Reconquista, a la que nun acudió nin un solu representante de la prensa, na que se diben esclariar toos estos puntos y pidir que la Fundación Princesa cancelara la entrega de Premios y el restu d’actos “y nós asina podriemos cancelar la manifestación. Pero los premios cellebraronse y nosotros vímonos obligaos a facer les protestes. Nun los queremos, nun queremos que vengan con impunidá y tolos reconocimientos. Vamos a siguir protestando y amosando la nuesa refuga“.
La viniente opinión correspuende a daquién mui mozu, pero coles coses mui clares, Andrés Fernández, de 17 años y procedente de Morcín, qu’acudió a la manifestación y a munchos otros actos revindicativos en representación de Darréu Mocedá Soberanista d’Izquierda y que define l’ambiente’l manifestamientu comu bonu, seique marcáu pola entrada d’Asturies na fase 2, destacando la muncha xente mozo repartío pelos bloques, anque amosándose daqué estrañáu pola presencia de mocedá en formaciones “españoles”, destacando que’l procesu d’aculturización y la dificultá del asturianismu p’averase a la xente xoven pueden tar na bas d’esta “españolización” de la mocedá.
A Andrés estos actos faenlu sentir la importancia de nun se rendir y siguir lluchando “hasta algamar cámbeos reales, non solo nesti ámbitu, ye dicir al rodiu de la contraposición monarquía/república, sinón en tolos demás que s’engloben en manifestaciones como estes, como’l drechu a decidir, la xusticia de social, la oficialidá de la nuesa llingua llariega, el socialismu…”. Finalmente quier denunciar la “descomanada y claramente vengativa actuación de la policía llocal tres la manifestación”.
Loli Gutiérrez, de 60 años, acudió al manifestamientu dende Mieres y participó na so organización, como fexo en tolos actos contra la Monarquía “non escoyía y corrupta” a la que considera una imposición del facismu y contra la que ye imprescindible implicase. Considera que l’ambiente nestos actos ye bonu, ve a la xente animada y con ilusión y nun duda en recordar que l’Estáu Repúblicanu ye’l caberu que surdió llexítimamente de les urnes.
Tolos entrevistaos pertenecen a estremaes organizaciones o acudieron por llibre a los actos de refuga, tienen edaes comprendies pente los 17 y los 60 años y acuden a los actos dende conceyos estremaos, una amuesa a la diversidá que compón esti movimientu al que namás xune una idega perclara: El pueblu asturianu nun almite dengún rei.
This work is licensed under a Creative Commons Attribution 4.0 International License.
