La Unión de Profesionales y Trabayaores Autónomos (UPTA) rexistró el preslle de 153 negocios d’hostelería y 52 comercios nun solu mes y anantes de qu’entamare la fase 2 y les actuales restriciones d’horariu

Los piqueños empresarios y autónomos tan pente los mayores perxudicaos poles consecuencies económiques de la crisis sanitario del Covid-19. El coleutivu, que’n Febreru amosaba señes d’espoxigue col rexistru de 170 autónomos nuevos, perdió de guelpe más de mil trabayaores demientres l’estáu d’alarma.

Los meses de Xunu y Xunetu, cola ilusión de la vuelta a la normalidá ya’l puxu dau al turismu, foron positivos, cola recuperación de cerca de 600 puestos; pero en Setiembre reanicióse la cuenta atrás, con 218 baxes rexistraes, de les que 153 correspuenden a negocios d’hostelería y 52 a piqueños comercios de venta al públicu. Les sidreríes foron unos de los negocios más afeutaos pola prohibición del usu de la barra, entantu los negocios d’arruelu nuecherniegu carecieron más les consecuencies del preslle anticipáu. Toos ellos foron perxudicaos pol ambiente de medrana ya inseguridá espardíu na población.

A estos preslles habría de sumase una trentena de baxes d’autónomos del seutor agropecuariu, el viniente más afeutáu poles baxes d’esti mes.

Nuria Prendes