Los presupuestos xenerales del Estáu contemplen 55 millones en bonificaciones pa Galicia pola Ap-9 y un incrementu de cero euros pa los usuarios de l’Autopista d’El Güerna,  un importante llastre para les empreses de tresporte y un de los factores que lleven a munches empreses a desllocalizase y treslladase a otros puntos del Estáu nos que nun tengan que pagar pa cruciar la frontera

Los peaxes, sobremanera si son la única vía de comunicación practicable pal tresporte de mercancíes pente dos países estremaos, perxudiquen el comerciu y l’economía de dambes zones, especialmente d’aquella que más incomunicada quede con otros territorios. Asina lo pescuda’l Gobiernu Español no que cinca a los 7 tramos d’autopistes del país que fixeron de baldre los postreros dos años y tamién con respeutu al peaxe de la Ap-9, autopista que xune Ferrol cola frontera portuguesa, polo qu’incluyó nes cuentes del Estáu, apocayá apurríes nel Congresu, trés partíes diseñaes pa compensar el costu de los sos peaxes y frenar les xubíes previstes hasta’l 2038. Estes bonificaciones van ser adicionales a les yá esistentes, que sumen más de cinco millones al añu.

Entantu Aucalsa, empresa concesionaria del Güerna, sigue inamovible, previsiblemente fasta’l 2050. Les bonificaciones disponibles pa los asturianos, en función del númberu de viaxes de día y revolvía nel mes, siguen siendo les mesmes que s’aprebaron hai 13 años y que caltienen a los asturianos permanentemente semiconfinados, con fielatu d’entrada a España.

Llucía F. Marqués