Fartos de qu’el so conceyu seya utilizáu como vertideru por empreses ayenes al conceyu, Bimenes alvierte de que va entamar a sancionar cualquier incumplimientu de la normativa d’usu del puntu llimpiu

La ordenanza sobro usu del puntu llimpio ye bien clara al respeutu: nun ta permitíu’l depósitu de materiales de fora’l conceyu. Amás, les borrafes nun se tán posando correchamente nos contenedores habilitaos a esi fin, sinón que son davezu llanzaos dende los vehículos al suelu del recintu, llegando a algamar el calce del ríu. Poro, y tres delles campañes -infructuoses- de concenciación, el Conceyu Bimenes entamó a sancionar a toes aquelles persones y empreses qu’incumplan la normativa sobro borrafes nel conceyu.

Hasta’l momentu, toles empreses y particulares sancionaos -con multes que van de los 50 a los 3000 €- vienen de fora de Bimenes, n’ocasiones de llocalidaes a más de 30 km del conceyu, que se mueven esplícitamente p’abandonar les sos basures nél.

Redaición InfoAsturies

This work is licensed under a Creative Commons Attribution 4.0 International License.