Tolos indicadores sanitarios amuesen a Xixón como la ciudá más perxudicada pola espansión de la segunda fola del covid-19, con porcentaxes de contaxos y hospitalizaos que s’averen más a los de les grandes capitales qu’a los del restu d’Asturies. Les estaciones de midía de la contaminación indiquen tamién que Xixón, xuntu con Uviéu, ye la ciudá más afeutada pola contaminación del aire. Dambos parámetros formen un cóctel catastróficu pa la salú respiratoria de la ciudá más poblada d’ Asturies

Xixón ta careciendo a día de güei una doble alarma: per una parte la derivada del coronavirus y per otra, dende va siete díes, la provocada polos peraltos niveles de partícules nel aire, neto que  l’alta concentración de bencenu, ensin que per parte de les autoridaes tea tomándose nengún tipu de midía p’amenorgar estos niveles nin se tea activando’l correspondiente protocolu de contaminación nel aire.
Acordies los datos oficiales apurríos pol Gobiernu d’Asturies y pol Conceyu de Xixón, el bencenu, tósicu en cualisquier cantidá, algamó picos d’ente 7 y 14  µg/m3 nel barriu de La Calzada, ún de los más castigaos poles emisiones contaminantes.

Coles mesmes, la media diaria de Pm 2’5, les más dañibles pa la salú, foi nesti barriu de 129 µg/m3 cuando la normativa almite un másimu de 25 µg/m3 de media, perriba de la que tendría d’activase’l protocolu d’alarma por contaminación. De la mesma manera, el porcentaxe de les partícules de mayor tamañu, les  Pm10, presentaben ayeri una media de 153 µg/m3  nes postreres 24 hores. Tamos falando de más del triple de valor d’emerxencia diariu, con picos 365  µg/m3.

Otres de les zones más afeutaes pola pésima calidá del aire ye L’Arena, con picos 300  µg/m3

Tolos estudios realizaos hasta’l momentu indiquen que la contaminación del aire incide bien negativamente en toles enfermedaes respiratories, coincidiendo los picos máximos de polución con espoxigues sustanciales nes hospitalizaciones por patoloxíes pulmonares. Les estadístiques sanitaries indiquen tamién que la incidencia y gravedá del covid-19 medra esponencialmente ente aquelles persones con problemes respiratorios previos, lo que convierte a la práutica totalidá de la población xixonesa, y más especialmente a los habitantes de La Calzada, El Natahoyo y L’Arena, en población de riesgu.