“Nun mos pueden dexar tiraos”, esti foi el mensaxe de les persones que, respetando les distancies de seguridá, aconceyaron güei na Plaza Mayor de Xixón y de Llangréu pa defender a la hostelería del conceyu
La desesperación apalpúñase pente los hosteleros d’Asturies. Los progresivos retayos d’horarios y zones y los cambeos continuos de istrucciones llevolos a pasar el caberu mes faciendo equilibrismos pa caltener unos negocios que, neses condiciones, son deficitarios. La decisión de presllar dafechu la hostelería, de la que foron informaos el llunes pasáu, nun vieno acompangada de denguna midía que mitigare la dureza del guelpe y munchos temen que los quince díes de preslle nun seyan más que l’entamu. Nun sedrán pocos los establecimientos que nun abran más les puertes.
Dende “Hostelería con Conciencia”, convocantes de la concentración, reconocen la necesidá de les medíes de proteición sociales “somos coscientes de que tamos pasando un momentu pelligrosu pa la salú, duro no social y no económico y qu’entendemos que les medíes de proteición de la sociedá son necesaries ya importantes” pero nun tan dimpuestos a ser los que carguen coles consecuencies económiques de les mesmes.
Les sos reclamaciones, que trataron d’apurrir, ensin ésitu, a l’alcaldesa de Xixón, tan empobinaes a atenuar el guelpe del preslle: la posibilidá d’acoyese a cese voluntariu, allargar los ERTE y sobre tou, atayar los gastos, tanto los de soministros comu los d’impuestos y alquileres, ya que ye inasumible siguir teniendo gastos cuando se yos torga tener ingresos.
Llucía F. Marqués
This work is licensed under a Creative Commons Attribution 4.0 International License.
