Los datos recoyíos pol informe AROPE alluga a Asturies comu la fastera con mayor tasa de probitú severa l’Estáu

La definición de probitú apurría nel añu 1984 pola Comunidá Económica Europea diz «la situación de persones, families y grupos, cuyos recursos económicos, sociales y culturales son tan llendaos que los escluyen del mou de vida que se considera aceutable na sociedá na que viven». N’Asturies l’umbral de probitú allúgase’n 9.009 euros añales por persona, 750 al mes por ca miembru de la familia. Per otru lláu, catalógase comu “probitú severo” la situación d’aquelles unidaes de consumu que cuenten con 6.006 € añales, unos 500 al mes.

Nel añu 2019 la tasa de probitú subió n’Asturies un 57%, algamando a cuasi una de cada cuatro presones, lo que acordies l’informe AROPE ye “El pior desendolcu de cualisquier comunidá na cabera década. Son 251. 863 los asturianos y asturianes que se veíen nesta situación a entamos d’añu, los piores datos dende que se recueyen rexistros oficiales, pero resulta evidente qu’esos son númberos que van multiplicase cara al prósimu informe, qu’incluyirá los datos del añu 2020 y los efeutos del andanciu.

No que cinca a probitú severa, situación na que les presones nun tienen acesu a los bienes básicos pa cubrir les sos necesidaes fundamentales, Asturies presentaba en xineru la pior media del Estáu, un 13’1 %.

L’informe afita que la creación d’emplegu por si sola nun soluciona la situación, ya que l’altísima precariedá llaboral que se carez nel país permite simultanear probitú y trabayu. Dao que los datos son anteriores a la crisis sanitaria que se ta careciendo, nun pue culpase a la mesma de la llaceriosa situación na que s’alcuentra’l país, teniendo que buscase les responsabilidaes n’aquellos qu’implementaron les polítiques económiques, llaborales y sociales que llevaron a Asturies a pasar de ser un de les  fasteres más prometedores d’Europa a ser el país con mayor tasa de presones en probitú severa.

Nuria Prendes

This work is licensed under a Creative Commons Attribution 4.0 International License.