¿Qué ye Nordés? Y tamién ¿Quíenes sois Nordés?

X: Nordés ye un proyectu pa facer un operador de telefonía móvil con raigaños nesta tierra. Pretendemos dar cobertura a un perfil de cliente que valora una forma diferente d’ufrir los servicios de telefonía dende la cercanía y con enfotu por defender los nuesos valores. Somos una empresa asturiana, afincada na nuestra tierra y que creemos y apostamos por ella.

F: En Nordés tamos como socios tres el proyectu Xicu Mata, con años d’esperiencia nel sector de la seguridá y telecomunicaciones cola so empresa Asturcón Seguridá, y yo mesmo, Félix Fernández, colo fecho n’Acuto Xuegos nesti tiempu.

Tamos nun intre nel que la mayoría la xente ta a veles venir, pero vosotros llanzais un proyeutu ambiciosu nun tarrén nel que la competencia colos “grandes” ye dura ¿Munchu valor o visión de negociu?

X: Somos conscientes que’l mercáu de les telecomunicaciones ye un mercáu maduru pero tamién que la demanda de los clientes va perfilando’l mesmu. En Nordés Móvil creemos qu’esiste un perfil de cliente que demanda una meyor atención de rempuesta, que-y presta más falar con persones enantes que mensaxes grabaos, saber que pue topanos na tienda del to barriu, con precios adaptaos a estos tiempos y con unos valores que defiendan el consumu llocal, esto ye Nordés y nun lo vemos nel mercáu de les telecomunicaciones, entá más adaptáu a la cantidá de clientes qu’a la calidá de los sos servicios.

¿Veis un bon nichu de mercáu nes telecomunicaciones n’Asturies?

F: Les telecomunicaciones tan en too y tan nel día a día de toles persones en tol mundiu, y si siempre foi mui necesariu plantegar el consumu como una ferramienta pa consiguir camudar munches coses, plantegar una operadora de telefonía móvil venceyada a la tierra pensamos que pue ser una propuesta bona ya interesante.

Un de los principales valores añadios de la vuesa empresa ye l’usu del asturianu como llingua vehicular, con absoluta normalidá ¿Tuvisteis dalgún encontronazu por esi tema?

X: Tolo contrariu, l’aceptación ye perbona y tamos encantaos.

 ¿Qu’apurre l’asturianu al vuesu proyectu?

X: Normalidá. Tamos n’Asturies y tanto el castellano como l’asturianu son llingües que s’utilicen nel día a día y en Nordés tenémoslo nidio, polo que l’usu de dambes llingües ye una ferramienta válida pa comunicanos.

¿Ya’l vuesu proyeutu al asturianu?

F: Queremos pensar que l’usu de l’asturianu por parte de Nordés seya un sofitu más a la dignificación y normalización del idioma y una demostración de que una Asturies n’asturianu ye posible porque hai una sociedá detrás que lo quier.

Seique lo que más llama l’atención de Nordés ye’l so componente llingüísticu, tamién nos interesa la base teunolóxica. ¿Qué servicios y con que carauterístiques ufre Nordés?

X: Entamamos ufriendo tarifes móviles ensin complexos, ello ye, llamaes illimitaes y xigues en función de la demanda del cliente. Dientru de cada pack de tarifes, ta la tarifa básica, el bono plus y el nuesu plan Nordés I+D. Esta última parte ye vital pal nueso proyectu y los nuesos clientes ya que va permitir medrar la nuesa base teunoloxica ufriendo nuevos avances que vamos dir viendo a curtiu/mediu plazu.

Y lo que más importa a muncha xente ¿Son les vueses tarifes competitives?

F: Pensamos qu’ufrimos bones tarifes pa entamar y qu’entren dientro de les tarifes más competitives que pue haber anguañu nel mercáu. Cierto ye qu’a meyor preciu siempre va haber quien lo dexe más barato que tu, nosotros aspiramos a ufrir bonos precios, cercanía y un proyectu, Nordés, que modestamente quier reinvertir los beneficios que pueda llegar a dar en siguir creando riqueza nel territoriu.