Andecha Astur denuncia que lo asocedío col Horru de Vis ye’l vivu exemplu de lo que representa la política cultural del PSOE n’Asturies: reconocencia nominal de la bayura cultural, renuncia a la intenvención al so favor, inhibición na so proteición, ocultamientu de la so responsabilidá política y llegal y, comu oxetivu final, guetar la perda la identidá cultural asturiana por llarga ruina y desatención, ye dicir un procesu inducíu de xenocidiu cultural

Andecha Astur denuncia a los dueños del horru, a José Félix Fernández Fernández (Alcalde d’Amieva), a Berta Piñán Suárez (Conseyera de Cultura, Política Llingüística y Turismu), a Pablo León Gasalla (Direutor Xeneral de Cultura y Padremuñu) y a Enrique Escudero Fernández (Xefe’l Sirviciu Proteición, Caltenimientu y Difusión del Padremuñu Cultural) pol incumplimientu de la bayurosa normativa llegal qu’obligaba a los dueños, a la Casa Conceyu y al Gobiernu d’Asturies a protexer esi bien.

Andecha Astur considera a toos culpables del esbarrumbu por ruina del Horru de Vis y, comu talos, presuntos responsables de faltes o delitos en materia de caltenimientu del padremuñu cultural d’Asturies. Poro, solicita de la Fiscalía que considere si los presuntos culpables tán obligaos a indemnizar polos daños y perxuicios causaos, por causa de dolu, neglixencia o morosidá, o por contravenir les sos obligaciones. Igualmente pide a la Fiscalía se posicione, “especialmente, sobro si les autoridaes y foncionarios denunciaos nun cometieron faltes contemplaes nel réxime disciplinariu de los emplegaos públicos, por notoriu incumplimientu de les fonciones esenciales propies del puestu de trabayu o fonciones que tienen encomendaes, considerando llegalmente cualisquier responsabilidá civil o penal que pudiere esistir”.

L’esbarrumbe, el 4 de Xunu, de l’Horru de Vis (Amieva), incluyíu nel Inventariu de Padremuñu Cultural d’Asturies nun foi sospresa pa naide que conociere’l so estáu ruinosu, nun foi un acidente inesperáu, sinón el resultáu d’años de desdexamientu que la so inclusión, en Xunetu del 2018, nel Inventariu de Padremuñu cultural d’Asturies (xunto con otros 38 bienes del Conceyu d’Amieva), nun foi quien a torgar.

Nel momentu del baltu, Andecha Astur empobinóse al presidente’l Gobiernu d’Asturies y a la Conseyera de Cultura pa qu’entamaren les necesaries investigaciones sobro la perda l’Horru de Vis, faciéndoles públiques y determinando quiénes yeren los responsables l’esbarrumbu. Como resultancia d’estes xestiones, l’executivu aceutó públicamente la propuesta d’Andecha Astur de recostruyir l’horru,  pero dende entós nun se cumplió esi compromisu, comu tampocu el de la Conseyera de Cultura d’aprebar una normativa que meyorase la identificación y proteición d’horros y paneres, incluiendo aides pa los propietarios. No que cinca a esclariar el fechu denunciáu, el Gobiernu d’Asturies nun anició dala investigación nin amosó intención de facelo.

Nuria Prendes

This work is licensed under a Creative Commons Attribution 4.0 International License.