Sieglos de tradición nel esmucir del desaniciu: vivir de la ganadería nuna sociedá que nun da valir a les formes de vida más tradicionales nin fae por adautales a los tiempos actuales ye un actu cuasi de rebeldía, los pocos pastores que queden en Picos faenlo más por pura llealtá que pol porgüeyu económicu, pero la desatención gubernamental, el cansanciu y la falta de relevu xeneracional van marcando’l camín de la so desapaición
Los caberos datos recoyios apunten a una cayía del 69’2% na reciella nes dos caberes décades, de les 19.380 cabeces de ganao menor nel espaciu protexíu del Parque nel añu 1997 a les escasamente 6.000 estos años, incluso cuntando les cabres y oveyes correspondientes a l’ampliación de territoriu del Parque a les Peñamelleres, nos años 2006 y 2015. De siguir esti camín, a Picos quedaríen-y malpenes 7 años de pastores. L’actual situación sanitario nun ayuda tampocu, el preslle de la hostelería déxalos ensin bona parte de los sos compraores y nes midíes del Gobiernu d’Asturies nun se contemplen aides compensatories pa esti seutor ; amás, la masificación d’urbanites a la gueta “d’un espaciu seguru” dificulta’l so llabor diariu.
Una de les opciones baraxaes comu salida a esta situación ye’l que la llexisllación qu’obligue, por exemplu, a que les denominaciones d’orixen de los quesos asturianos utilicen esclusivamente llechi catao na so fastera -anguañu ye avezao la importación de llechi de cabra pa la ellaboración de quesos- al tiempu que se promociona’l consumu d’estos quesos. Pero con ello nun sedría abondo, hai que crear canales efeutivos de venta y enfrentar cuestiones comu les males comunicaciones (físiques y de rede), la baxa rentabilidá de la ganadería, la desproteición ante la carne foriato, -criao en masa, cola que ye imposible competir en mercáu-, l’escesu de burocratización y la llucha continuo pol espaciu col turismu invasivu.
De nun tomase darréu midies, taríemos asistiendo al desaniciu d’una cultura ya unos vezos perfilaos demientres sieglos poles nueses montañes, quiciás la más puramente asturiana qu’entá se caltién viva.
This work is licensed under a Creative Commons Attribution 4.0 International License.
