La formación nacionaliega fexo pública ayeri la so presentación de candidatos pa la XXXVI edición del prestixosu premiu de la Xunta Pola Defensa la Llingua, que reconoz el llabor fecho por (Pegoyu) y contra (Madreña) la llingua asturiana

Comu cantidatu al Pegollu proponen a don Xosé Lluis García Arias, que fore presidente de l’Academia la Llingua Asturiana y fundaor y presidente de Conceyu Bable, figura hestórica de la brenga llingüística, reconocíu filólogu y profesor al que se-y deben los mayores llogros na normalización del asturianu. Una candidatura que, gane o non, nun creará espirica por ser los méritos d’Arias sobradamente conocíos y reconocíos.

Como contrapuntu, Andecha Astur propón comu cantidatu a la Madreña de Purpurina na XXXVI convocatoria de los Premios Andrés Solar a don Adrián Barbón Rodríguez, actual presidente del Gobiernu d’Asturies y  secretariu xeneral de la FSA-PSOE, quien algamó la presidencia sofitándose nuna pretendía defensa, teórica y valera, de la oficialidá del asturianu, pero qu’una bones nel puestu traicionó los enfotos puestos nelli, non solo dexando la revindicación llingüística llendada a una riestra de detalles aneudóticos, sinon recientemente humildando, en dos ocasiones, a los asturfalantes, al agachar la tiesta ante los dos grupos españoles d’estrema drecha, Ciudadanos y VOX. La primer vegá qu’amosó la so sumisión foi al camudar de llingua a media intervención por desixencia de VOX y más recientemente comunicando  al grupu de Ciudadanos na Xunta Xeneral que’l Gobiernu que preside renuncia a tratar la custión de la oficialidá nel añu 2021. “Tres de 40 años de gobiernos del PSOE que torgaron la llingua’l nuesu país, con Adrián Barbón la rialidá llingüística d’Asturies nun camudó un res”.

Pa presentar estes dos candidatures, Andecha Astur fexo l’esfuerciu previu de contrastar n’estremaos ámbetos de la sociedá asturiana’l so xacíu, atopando una acoyía bien favoratible a les mesmes. El plazu pa presentar propuestes al premiu fina’l caberu díe del presente mes ya’l fallu daráse a conocer a lo llargo del mes d’Avientu.

Redaición InfoAsturies

This work is licensed under a Creative Commons Attribution 4.0 International License.