La organización nacionaliega, que forma parte del coleutivu “Asturies nun tien Rei”, presentó n’Ochobre una riestra d’aniciatives al Congresu, a la Xunta Xeneral y a los principales conceyos asturianos pidiendo que dexen de financiar con dineru públicu la Fundación Princesa

La Presidencia de la Xunta Xeneral vien de notificar a Andecha Astur l’almisión a trámite de la so propuesta, na que ser recueye la pidición d’una resolución que suponga l’acabu les sovenciones que la Xunta Xeneral y el Gobiernu d’Asturies dan añalmente a la Fundación Princesa. La propuesta foi treslladá a los Grupos Parllamentarios, que sedrán quienes decidan si sigue p’alantre o non. Basta con que dalgún de los Grupos que formen el gobiernu d’Asturies, pente los que s’alcuentren partíos que s’auto denomen republicanos, comu ye’l casu de Podemos o IU, asuma la reclamación, pa que s’alderique’n plenu la puesta en marcha d’esti proyeutu.

Sicasí, dende Andecha Astur nun s’amuesen optimistes al respeutu “Paez difícil qu’asuman una propuesta tan concreta como la fecha por Andecha Astur, si tenemos en cuenta que, posturéu aparte, dengún de los grupos parllamentarios presentes na Xunta Xeneral vien tomando denguna iniciativa nesi sen“. El so pesimismu vien reforciau pola esperiencia, ya qu’esta nun ye la primer vegá que propuestes d’Andecha Astur son almitíes pola Presidencia de la Xunta Xeneral, y se-yos da treslláu a los Grupos Parllamentarios, “pero fasta agora estos grupos vienen faciendo’l vacíu a diches propuestes, como ye’l casu de l’anterior na que se pidía cellebrar istitucionalmente la declaración del Conseyu Soberanu d’Asturies y Lleón;  lo que pon n’evidencia’l posturéu d’aquellos grupos que caltienen posicionamientos públicos nesi sen, pero que nin tienen iniciatives polítiques consecuentes, nin asumen les de los demás cuando les faen”.

En cualisquier casu, y anque la propuesta quedare frenada pola inaición de los grupos parllamentarios, p’A.A. sigue siendo emportante facer esta triba d’iniciatives, coles que traten de marcar distancies cola forma de facer política de los actuales grupos parllamentarios.

Nuria Prendes