El Conceyu Bimenes pidi a los vecinos qu’engalanen la so casa per fuera pa estes feches navidiegues y anuncia dos comunicaos recibios por parte’l serviciu de comunicación de SS.MM los Reis Magos d’Oriente

Pesi a ser coscientes de qu’estes próximes fiestes navidiegues van ser atípiques a cuenta del andanciu’l coronavirus, son munchos los conceyos que siguen enfotaos en facer que sigan siendo unes feches especiales, como ye’l casu del de Bimenes. Poro, proponen a la vecindá qu’aguape les sos cases engalanándoles lo más posible per fuera, con decoración navidiega de toa triba –más si cabe qu’otros años– y una vez fecho, que se mande una semeya a la direición de corréu electrónicu ayuntamientubimenes@gmail.com coles señes afayadices. Toles semeyes que vaigan llegando, afitando de plazu máximu pa ello’l sábadu 19 d’avientu, van asoleyase na páxina de Facebook municipal y a los dueños de la imaxe que tenga más “me gusta” va facése-yos llegar una cesta con productos de Bimenes como premiu. El plazu pa votar pola semeya de la casa cola decoración navidiega más prestosa queda afitáu ente’l domingu 20 y el Día de Nadal, vienres 25 d’avientu.

D’otra miente, anuncien la receición d’una comunicación del Príncipe Aliatar, nel sen de que nun va poder recibir a les neñes y neños del conceyu na Casa Cultura de Santuyano, como yera vezu, pero que ta dimpuestu a dir pelos pueblos a recoyer les cartes empobinaes a les SS. MM. los Reis Magos d’Oriente nel casu de qu’haiga neños y neñes que nun tengan otra manera de mandales. Nesti casu l’actividá ta programada pal domingu 27 d’avientu, que ye cuando cuenta Aliatar visitar Bimenes. Pa esta actividá fáese necesario que mas y pas de les neñes y neños que quieran apurrí-y personalmente la so carta a Aliatar avisen na Casa Conceyu, llamando al teléfonu 985700004 nos díes enantes, col enfotu de que dende l’Ayuntamientu Bimenes podamos echá-y un gabitu a Aliatar a organizar meyor la so xira per tierres yerbates.

Pa finar, nel Ayuntamientu Bimenes tamién recibieron comunicación de les SS. MM. los Reis Magos d’Oriente relativa a que’l próximu 5 de xineru la Cabalgata nun se va cellebrar peles cais de Santuyano con presencia de públicu, como ye vezu tamién, pa evitar que la xente s’amontone y asina mirar meyor pola salú de toes y toos, en riesgu dende hai meses a cuenta del andanciu. Sicasí, van tratar de que nengún neñu o neña de Bimenes –que saben que se portaren perbién y más nesti tiempu tan murniu– quede ensin los sos regalos y que tratarán tamién de visitar tolos pueblos del conceyu, a lo llargo la tarde’l día 5, pa que la reciella yerbato pueda saludalos ensin salir de casa, que ye onde hai que tar. La salida de les SS. MM. los Reis Magos d’Oriente va ser dende Fayacava a les 17:00 hores, percorriendo los pueblos de Bimenes siguiendo un orde que tán estudiando estos díes xunto colos responsables municipales.

Esta riestra d’actividaes navidiegues, adautaes a la situación sanitaria, fáense con calter preventivu y nun quiten de siguir cumpliendo con toles midides de seguridá afitaes poles autoridades sanitaries, principalmente l’usu de mázcara y el caltenimientu de les distancies de seguridá ente la vecindá.

This work is licensed under a Creative Commons Attribution 4.0 International License.