Estos 36 despidos xúnense a los 7 anunciaos a primeros d’añu y que prevocaron na terminal el mayor conflictu llaboral de la mesma, cola fuelga de fame que protagonizaron 4 trabayadores demientres 37 díes
La empresa de titularidá pública EBHI, de la que ye acionista mayoritaria l’Autoridá Portuaria de Xixón, sumaría con estos un total de 43 despidos, cifra qu’implica un amenorgamientu d’un terciu de la plantiya. A esto xúnese-y l’ERTE que la empresa vien aplicando dende’l mes de mayu y previsiblemente dica’l 31 d’avientu del 2021, col cual los trabayadores perciben el 55% del so salariu nos periodos que tán regulaos.
L’argumentu remanáu pola dirección de EBHI ye una teóricu amenorgamientu d’un 8% de la descarga nel puertu, que difícilmente xustificaría un retayu d’alredor del 40% de la presencia llaboral.
La xestión per parte de Laureano Lourido Artime, Presidente de EBHI, y Lucía Ferreru Batalla, Directora Xerente de EBHI, xuntu col so Conseyu d’Alministración, fai abarruntar a los afeutaos la intención de derivar a la empresa escontra un progresivu esmantelamientu para finalmente privatizala, too ello énte la indiferencia del Gobiernu d’Asturies, de quien depende direutamente la empresa al tar presente nel so Conseyu d’Alministración y nomar al presidente de l’Autoridá Portuaria, que tamién lo ye de EBHI, asina comui a la Xerente de la empresa.
Sindicatos y trabayadores coinciden n’apuntar que se trata d’una maniobra de destrución d’emplegu, aprofitando les circunstancies xeneraes pola crisis sanitaria, yá que fasta l’españíu de la mesma nel mes de marzu, les cuentes de EBHI yeren solventes.
Llucía F. Marqués
This work is licensed under a Creative Commons Attribution 4.0 International License.
