Fueron los vecinos de Salas los que dieron la voz d’alarma sobro’l llabor estractivo de caolín que ta desendolcándose dende va dalgún tiempu na zona de La Espina
La mina de caolín a cielu abiertu taba a la espera de l’aprobación o denegación del PGOU del Conceyu de Salas nel que se solicitaba’l cambéu del suelu a industrial de la zona de La Curriquera, ente les llocalidaes de La Curriquera y La Bouga, al par de La Espina,
Entamar l’actividá ensin tar resueltu’l cambéu del PGOU sedría una illegalidá evidente, una y bones el PGOU ye solo’l primer pasu pa permitir la esplotación minera, que taría pendiente tamién de la resolución d’evaluación ambiental. Sicasí, l’actividá minera ye visible y apréciase dende numberosos llugares, como pue vese nes imaxes.
L’actividá minera a cielu abiertu, tien un bultable impautu nel mediu ambiente, con una clara afeición a la contaminación del aire pola dispersión pola aición del vientu del caolín, siendo tamién un importante factor de contaminación de l’agua pol arrastre del mineral contamináu escontra los acuíferos y calces, daqué que yá se puede apreciar na zona, lo mesmo qu’el so fuerte impautu paisaxísticu.
La Coordinadora Ecoloxista d’Asturies, acordies con los vecinos, yá solicitó tanto al Conceyu como a la Viceconseyería de Mediu Ambiente y Cambéu Climáticu una esplicación énte’l fechu de que se tea dexando l’actividá minera en Salas ensin tar resueltu’l trámite previu de cambéu del PGOU “Hai que recordar que llevamos años denunciando la tolerancia que tien el Gobiernu d’Asturies y los Conceyos coles actividaes mineres irregulares, como se demuestra coles decenes d’esplotaciones abandonaes ensin restaurar, contaminando la redolada dempués de ser abandonaes” declaren dende la CEA.
Redaición InfoAsturies
This work is licensed under a Creative Commons Attribution 4.0 International License.
